ডিজিটেল ডেস্ক: অসমৰ আঞ্চলিকতাবাদী ৰাজনৈতিক দল অসম গণ পৰিষদৰ ভাগ্যনিয়ন্তা হৈ পৰিছে ভাৰতীয় জনতা পাৰ্টী৷ সমাগত লোকসভা নিৰ্বাচনত বিজেপিৰ ভূমিকাৰ ওপৰতে নিৰ্ভৰশীল হৈ পৰিছে অগপৰ ৰাজনৈতিক ভৱিষ্যৎ৷
ৰাষ্ট্ৰীয়তাবাদী ৰাজনীতিৰ আগ্ৰাসনত আঞ্চলিকতাবাদী চিন্তা-চেতনাক জলাঞ্জলি দিয়া অগপৰ দুই নেতা অতুল বৰা আৰু কেশৱ মহন্তৰ এতিয়া ভাগ্য নিৰ্ধাৰণ কৰে বিজেপিয়ে৷ লোকসভা নিৰ্বাচনত নিজাববীয়াকৈ প্ৰাৰ্থিত্ব প্ৰক্ষেপ কৰিবলৈ এতিয়া আৰু সাহে নুকুলায় অগপৰ কেন্দ্ৰীয় নেতৃত্বক৷
লোকসভা নিৰ্বাচনত দলটোৰ ভূমিকা কি হ’ব অথবা দলটোৰ সাংগঠনিক ভেটি ক’ত কিমান শক্তিশালী, তাৰ গমগতি লোৱাৰ প্ৰয়োজনবোধ নকৰে কেন্দ্ৰীয় নেতৃত্বই৷ অতুল বৰাই গম নোপোৱা অগপৰ ভিতৰচ’ৰাৰ তথ্য ৰাজহুৱা কৰে বিজেপিয়ে৷
শেহতীয়াকৈ বিজেপিৰ ৰাজ্যিক সভাপতি ভৱেশ কলিতাই সমাগত লোকসভা নিৰ্বাচনত এখন আসন ইউপিপিএলক আৰু এখন আসন অগপক এৰি দিয়া হ’ব বুলি ঘোষণা কৰিছে৷ ভৱেশ কলিতাই বিজেপিৰ ৰাজ্যিক সভাপতি হিচাপে দায়িত্বসহকাৰে ঘোষণা কৰিছে যে লোকসভা নিৰ্বাচনত এজন অগপ প্ৰাৰ্থীক জয়ী কৰোৱাটো বিজেপিৰ দায়িত্ব৷ সভাপতি কলিতাই কয়, এইবাৰ হাতীৰ প্ৰতীকত অগপই এজন সাংসদ পাবলৈ সক্ষম হ’ব৷
অৰ্থাৎ, এখন আসনতে এইবেলি সন্তুষ্ট থাকিব লাগিব অগপ৷ বিজেপিৰ অনুগ্ৰহৰ ওপৰতে নিৰ্ভৰ কৰিব অগপৰ ৰাজনৈতিক ভৱিষ্যৎ৷
Continue Reading
