ডিজিটেল ডেস্কঃ মুছলমান যুৱকৰ সৈতে বিজেপি নেতাৰ কন্যাৰ বিয়াক লৈ প্ৰতিবাদ আৰম্ভ হৈছে! উত্তৰাখণ্ডৰ ভাৰতীয় জনতা পাৰ্টিৰ নেতা যশপাল বেনামৰ কন্যাৰ বিবাহ ঠিক হৈছে এজন মুছলমান যুৱকৰ সৈতে। ছচিয়েল মিডিয়াত ভাইৰেল হৈ পৰিছে এই বিবাহৰ কাৰ্ড।
হিন্দুত্ববাদী সংগঠনসমূহে এই বিবাহৰ তীব্ৰ প্ৰতিবাদ সাব্যস্ত কৰে। ইয়াৰ পিছতে যশপালে খৰখেদাকৈ কন্যাৰ বিয়াৰ অনুষ্ঠান স্থগিত কৰে।
উত্তৰাখণ্ডৰ বিজেপি নেতাগৰাকীয়ে নিজৰ কন্যাৰ বিয়াৰ ব্যৱস্থা কৰে কন্যাৰ প্ৰেমিকৰ লগত। অৱশেষত জীয়েকৰ বিবাহ ভংগ কৰিবলৈ বাধ্য হ’ল নেতাগৰাকী।
নেতাগৰাকীয়ে কয়- “এজন জনপ্ৰতিনিধি হিচাপে মানুহৰ অনুভুতিক মই সন্মান কৰো।” তদুপৰি জনায় যে দৰাৰ পৰিয়ালৰ সৈতে ‘পাৰস্পৰিক সন্মতি’ত ছোৱালীজনীৰ বিবাহ বাতিল কৰা হৈছে।
অহা ২৮ মে’ত বিজেপি নেতাৰ কন্যাৰ বিবাহৰ কথা আছিল। শনিবাৰে সাংবাদিকৰ আগত বিজেপি নেতাগৰাকীয়ে কয় যে ২৮ মে’ত হ’বলগীয়া এই বিবাহ এতিয়া বাতিল কৰা হৈছে। অৱশ্যে পৰিয়াল আৰু শুভাকাংক্ষীসকলৰ সৈতে আলোচনা কৰি পৰৱৰ্তী সিদ্ধান্ত লোৱা হ’ব বুলিও তেওঁ কয়।
উল্লেখ্য যে পাউৰি গড়ৱালৰ পৌৰসভাৰ অধ্যক্ষ পদত আছে বিজেপি নেতাগৰাকী। শুকুৰবাৰে হিন্দুত্ববাদী সংগঠনসমূহে বিজেপি নেতা যশপালৰ বিৰুদ্ধে প্ৰতিবাদ সাব্যস্ত কৰে। সংগঠনসমূহে তেওঁৰ প্ৰতিমূৰ্তিও জ্বলাই দিয়ে। এই প্ৰতিবাদত বিশ্ব হিন্দু পৰিষদ, ভৈৰৱ সেনা আৰু বজৰং দলে অংশগ্ৰহণ কৰে।
Continue Reading
