ডিজিটেল ডেস্কঃ প্ৰধানমন্ত্ৰী নৰেন্দ্ৰ মোদীয়ে বৃহস্পতিবাৰে আয়োজিত বিজয় দিৱসত ভাৰত-পাক যুদ্ধৰ শ্বহীদসকললৈ শ্ৰদ্ধাঞ্জলি জ্ঞাপন কৰে। ১৯৭১ চনৰ আজিৰ দিনটোতে বাংলাদেশ মুক্তি যুদ্ধৰ সময়ত পাকিস্তানে ভাৰতৰ ওচৰত আত্মসমৰ্পণ কৰিছিল। প্ৰধানমন্ত্ৰীয়ে ১৬ ডিচেম্বৰৰ গৌৰৱময় ইতিহাসৰ কথা স্মৰণ কৰে।
১৬ ডিচেম্বৰৰ নায়কসকলক শ্ৰদ্ধাঞ্জলি জ্ঞাপন কৰি মোদীয়ে লিখিছে, "আজি বিজয় দিৱস। সেই দিনটোৰ যোদ্ধাসকলৰ নিষ্ঠা আৰু বীৰত্ব এতিয়াও আমাৰ স্মৃতিত উজ্জ্বল হৈ আছে। তেওঁলোকৰ নিষ্ঠা আৰু ত্যাগ দেশবাসীৰ বাবে গৌৰৱৰ বিষয়। তেওঁলোকৰ অদম্য ইচ্ছা চিৰকাল আমাৰ হৃদয়ত থাকিব। ভাৰতে তেওঁলোকৰ সাহসক অভিবাদন জনাইছে।’’ প্ৰতিৰক্ষা মন্ত্ৰী ৰাজনাথ সিঙেও বিজয় দিৱস উপলক্ষে শ্বহীদসকলক শ্ৰদ্ধাঞ্জলি জ্ঞাপন কৰে।
সেনাৰ ইষ্টাৰ্ণ কমাণ্ডৰ মুখ্য কাৰ্যালয় ফৰ্ট উইলিয়ামত আজি বিজয় দিৱস উদযাপন কৰা হয়। ১৯৭১ চনৰ ভাৰত-পাক যুদ্ধত বিজয়ৰ স্মৃতিত এক বিশেষ অনুষ্ঠানৰ জৰিয়তে শ্বহীদসকলক শ্ৰদ্ধাঞ্জলি জ্ঞাপন কৰা হয়। ইষ্টাৰ্ণ কমাণ্ডৰ মুৰব্বী লেফটেনেণ্ট জেনেৰেল ৰাণা প্ৰতাপ কলিতাই এই অনুষ্ঠানত অংশগ্ৰহণ কৰে৷ অৰুণাচল প্ৰদেশৰ সন্দৰ্ভত সোধা প্ৰশ্নৰ উত্তৰত কলিতাই কয়, "ভাৰতীয় সেনা সকলো পৰিস্থিতিৰ বাবে প্ৰস্তুত। প্ৰকৃত নিয়ন্ত্ৰণ ৰেখাৰ (এলএচি) অৱস্থান সম্পৰ্কে ভাৰতৰ ধাৰণা অতি স্পষ্ট। চীনে তিব্বত দখল কৰিলেও ভাৰতৰ সাৰ্বভৌমত্বত আঘাত কৰিব নোৱাৰিব। "
Continue Reading
