বিমুদ্ৰাকৰণৰ পাছতে তীব্ৰ গতিত বৃদ্ধি নগৰীয়া দৰিদ্ৰতা, বিশ্ব বেংকৰ প্ৰতিবেদনত বিস্ফোৰক তথ্য

ডিজিটেল ডেস্কঃ  কেৱল চৰকাৰেই নহয়, দেশৰ সংবাদ মাধ্যমেও এতিয়া কিদৰে তথ্য গাপ দিয়া তথা একোটা তথ্যৰ আঁৰৰ সত্যক আংশিক ৰূপত উপস্থাপন কৰিবলৈ আৰম্ভ কৰিছে তাৰ এক শেহতীয়া নিদৰ্শন দেখিবলৈ পোৱা গৈছে। বিশ্ব বেংকৰ এখন প্ৰতিবেদনৰ প্ৰসংগতে এই কথা চৰ্চালৈ আহিছে। শেহতীয়াকৈ বিশ্ব বেংকে প্ৰকাশ কৰা এখন প্ৰতিবেদনত উল্লেখ কৰিছিল যে, ভাৰতত অতি গুৰুতৰ দৰিদ্ৰতা হ্ৰাস পাইছে। ২০১১চনৰ পৰা ২০১৯চনৰ ভিতৰত দেশত অতি দৰিদ্ৰ শ্ৰেণীৰ লোকৰ পৰিমাণ ১২.৩ শতাংশ হ্ৰাস হৈছে। এই তথ্যক লৈ দেশৰ সংবাদ মাধ্যমত ব্যাপক চৰ্চা হোৱা পৰিলক্ষিত হৈছে। কিন্তু এই প্ৰতিবেদনতে উল্লেখ কৰা এটা তথ্য তাতপৰ্যপূৰ্ণভাৱে চৰ্চাৰ পৰা আঁতৰাই ৰখা হৈছে।

প্ৰতিবেদনখনত লগতে এক গুৰুত্বপূৰ্ণ তথ্য উল্লেখ কৰি সদৰি কৰা হৈছিল যে, দেশত বিমুদ্ৰাকৰণৰ পদক্ষেপ গ্ৰহণ কৰাৰ পাছতে নগৰীয়া দৰিদ্ৰতা বৃদ্ধি পাইছে তীব্ৰ ৰূপত। প্ৰধানমন্ত্ৰী নৰেন্দ্ৰ মোদীৰ চৰকাৰৰ প্ৰথমটো কাৰ্যকালতে এক অপ্ৰত্যাশিত সিদ্ধান্ত গ্ৰহণ কৰা হৈছিল। এই সিদ্ধান্ত অনুসৰি দেশত প্ৰচলিত হৈ থকা ৫০০ আৰ ১০০০টকীয়া নোট বন্ধ কৰি দিয়া হৈছে। বিমুদ্ৰাকৰণ নামেৰে আখ্যা দিয়া এই বিতৰ্কিত সিদ্ধান্তই দেশৰ অৰ্থনীতিত ব্যাপক প্ৰভাৱ পেলোৱাটো স্পষ্ট হৈ পৰিছিল পৰৱৰ্তী সময়ত। দেশত নগদ ধনৰ নাটনি হোৱাৰ লগে লগে ক্ষুদ্ৰ ব্যৱসায়ীসকল ব্যাপকভাৱে ক্ষতিগ্ৰস্ত হৈ পৰিছিল আৰু তাৰ ফলত বহু লোকে দৰিদ্ৰতাৰ ফালে গতি কৰিবলগীয়া পৰিস্থিতিৰ সৃষ্টি হৈছিল বুলি প্ৰতিবেদনখনত প্ৰকাশ পাইছে। ২০১৬ চনত চৰকাৰে গ্ৰহণ কৰা এই পদক্ষেপৰ বাবে নগৰীয়া দৰিদ্ৰতা তীব্ৰ গতিত বৃদ্ধি পাইছিল। অৱশ্যে এই অৱস্থাৰ পৰা খৰতকীয়াকৈ পুনৰুদ্ধাৰো হৈছিল বুলি প্ৰকাশ পাইছে।

ভাৰতত দৰিদ্ৰতা বিগত দশকটোত হ্ৰাস হৈছে যদিও আশা কৰা হাৰত হ্ৰাস হোৱা নাই বুলি প্ৰতিবেদনখনত কোৱা হৈছে। অৰ্থনীতিবিদ সুতীৰ্থ সিং ৰয় আৰু ৰয় ভান ডাৰ ৱেইডে প্ৰস্তুত কৰা এই প্ৰতিবেদনখনত প্ৰকাশ পোৱা মতে ২০১১ চনত দেশত ২২.৫ শতাংশ লোক চৰম দৰিদ্ৰতাৰ কৱলত থকাৰ বিপৰীতে ২০১৯ চনত এই পৰিমাণ হৈছিল ১০.২ শতাংশ। এই সময়ছোৱাত ১২শতাংশৰো অধিক পৰিমাণে লোক চৰম দৰিদ্ৰতাৰ কৱলৰ পৰা মুক্ত হৈছিল। কিন্তু মন কৰিবলগীয়া কথাটো হৈছে যে, ২০০৪ চনৰপৰা ২০১১চনৰ সময়ছোৱাত যিটো হাৰত দৰিদ্ৰতাৰ হাৰ হ্ৰাস হৈছিল সেই হাৰ তাৰ পৰৱৰ্তী দশকটোত কম হৈ পৰিছিল।

প্ৰতিবেদনখনত লগতে উল্লেখ কৰা হৈছে যে, গ্ৰামাঞ্চলতকৈ চহৰ অঞ্চলত দৰিদ্ৰতা হ্ৰাসৰ হাৰ কম। ইয়াৰ কাৰণ হিচাপে বিমুদ্ৰাকৰণৰ দৰে সিদ্ধান্তক জগৰীয়া কৰিছে প্ৰতিবেদনখনত। অৱশ্যে ই পেলোৱা প্ৰভাৱৰ পৰা মুক্তিও খৰতকীয়াকৈ হোৱা বুলি প্ৰতিবেদনখনত লগতে কোৱা হৈছে।