ডিজিটেল ডেস্কঃ বিনা প্ৰয়োজনত ইউক্ৰেইনলৈ নাযাব। ৰাছিয়াই শেহতীয়াকৈ ইউক্ৰেইনৰ ওপৰত নিৰ্বিচাৰে আক্ৰমণ কৰাৰ সময়তে ভাৰতে দেশবাসীক এই উপদেশ জ্ঞাপন কৰিছে।
ইউক্ৰেইনৰ ৰাজধানী কিয়েভস্থিত ভাৰতৰ দূতাবাসে প্ৰেৰণ কৰা এই উপদেশপত্ৰখনত লিখা হৈছে যে দেশখনত শেহতীয়াকৈ দেখা দিয়া যুদ্ধসদৃশ পৰিস্থিতিলৈ লক্ষ্য ৰাখি সকলো ভাৰতীয়ক ইউক্ৰেইনলৈ যাত্ৰা কৰাত বাৰণ কৰা হৈছে।
ইউক্ৰেইনত বসবাস কৰি থকা ভাৰতীয় লোকসকলকো বিনা প্ৰয়োজনত দেশখনত চলা ফিৰা কৰাৰ পৰা বিৰত থাকিবলৈ কোৱা হৈছে। প্ৰবাসী ভাৰতীয়সকলক ভাৰতীয় দূতাবাসৰ স’তে যোগাযোগ ৰাখিবলৈও কোৱা হৈছে। তদুপৰি ইউক্ৰেইনৰ চৰকাৰ আৰু স্থানীয় প্ৰশাসনসমূহৰ সুৰক্ষাজনিত নিয়মাৱলীসমূহ মানি চলিবলৈ ভাৰতৰ দূতাবাসে আহ্বান জনাইছে।
উল্লেখযোগ্য যে শেহতীয়াকৈ পুনৰ ৰাছিয়াই ইউক্ৰেইনৰ কেইবাখনো চহৰত বোমা নিক্ষেপ কৰিছে। আৰক্ষীয়ে প্ৰকাশ কৰামতে, কমেও দহ জন লোক এই আক্ৰমণত নিহৰত হৈছে।
আনহাতে, ইউক্ৰেইনৰ শেহতীয়া পৰিস্থিতিক লৈ ভাৰত চৰকাৰে কোনোধৰণৰ প্ৰতিক্ৰিয়া প্ৰকাশ কৰা নাই। কূটনৈতিক বাৰ্তালাপৰ জৰিয়তে ইয়াক সমাধান কৰিব পৰা যাব বুলি ভাৰত চৰকাৰৰ তৰফৰ পৰা কোৱা হৈছে।
নতুন দিল্লীত বৈদেশিক মন্ত্ৰালয়ৰ মুখপাত্ৰ অৰিন্দম বাগছিয়ে কয় যে ইউক্ৰেইনত দেখা দিয়া সংকটক লৈ ভাৰত উদ্বীগ্ন আৰু ইয়াৰ সমাধানৰ ক্ষেত্ৰত ভাৰত চৰকাৰে সম্পূৰ্ণ সহযোগ আগবঢ়াইছে।
Continue Reading
