ইৰাণৰ ড্ৰোনৰে ইউক্ৰেইনক আক্ৰমণ কৰিছে ৰাছিয়াই ইউক্ৰেইনৰ ৰাষ্ট্ৰপতি জেলেনস্কীৰ অভিযোগ

মিছাইলৰ উপৰিও, ইৰাণত নিৰ্মিত ড্ৰোনৰ দ্বাৰা  ইউক্ৰেইনৰ বিভিন্ন চহৰত বিমান আক্ৰমণ কৰিবলৈ ব্যৱহাৰ কৰা হৈছে। ইউক্ৰেইনৰ ৰাষ্ট্ৰপতি ভ’ল’ডিমিৰ জেলেনস্কীয়ে  সোমবাৰে এই অভিযোগ উত্থাপন কৰে । ৰাছিয়াৰ মস্কো আৰু  ইৰাণৰ সৈতে দীৰ্ঘদিন ধৰি সামৰিক সহযোগিতা আছে। অৱশ্যে,ইউক্ৰেইনৰ ৰাষ্ট্ৰপতিজনৰ অভিযোগ অনুসৰি প্ৰথমবাৰৰ বাবেহে ৰাছিয়াই মুকলিকৈ ইৰাণৰ সহযোগত আন দেশক আক্ৰমণ কৰিছে৷ 

সোমবাৰে ইউক্ৰেইনৰ ঘন বসতিপূৰ্ণ অঞ্চলসমূহত অতি কমেও ৭৫ টা বিমান আক্ৰমণ কৰা হৈছিল৷  যাৰ ভিতৰত আছে ৰাজধানী কিয়েভ, ঔদ্যোগিক চহৰ লেভিভ আৰু পাৰমাণৱিক শক্তি প্ৰকল্প জাপোৰিজিয়াৰ ওচৰৰ উপনগৰসমূহ। জেলেনস্কী চৰকাৰে অভিযোগ কৰিছে যে ইয়াৰ ফলত বহু নাগৰিকৰ প্ৰাণ হানি হোৱাৰ লগতে বৃহৎ পৰিমাণৰ আন্তঃগাঁথনি ধ্বংস হৈছে। জেলেনস্কীয়ে কৈছিল যে ৰাছিয়াৰ এই নিৰ্মম আক্ৰমণৰ উদ্দেশ্য আছিল ইউক্ৰেইনক নিঃচিহ্ন কৰি পেলোৱা। উল্লেখযোগ্য যে, যোৱা সপ্তাহত ৰাছিয়াৰ বায়ু সেনাই ইউক্ৰেইন বিৰুদ্ধে  ৰাছিয়াৰ  আটাইতকৈ উন্নত চুখোই-৩৫ এছ যুঁজাৰু জেট ব্যৱহাৰ কৰা আৰম্ভ কৰিছিল। ৰাছিয়াৰ প্ৰতিৰক্ষা মন্ত্ৰালয়ে দাবী কৰিছে যে পঞ্চম প্ৰজন্মৰ যুঁজাৰু বিমানে নিৰ্ভুল লক্ষ্য আক্ৰমণ কৰাৰ লগতে শত্ৰুৰ ৰাডাৰ নিৰীক্ষণৰ পৰা যথেষ্ট পৰিমাণে আক্ৰমণ  চলিব পাৰে।