ককাকৰ সম্পত্তিত নাতিৰ কোনো জন্মগত অধিকাৰ নাথাকে; উচ্চতম ন্যায়ালয়ৰ গুৰুত্বপূৰ্ণ ৰায়

ডিজিটেল ডেস্ক: ককাকৰ সম্পত্তিত নাতিৰ কোনো জন্মগত অধিকাৰ নাথাকে। উচ্চতম ন্যায়ালয়ে দিয়া এটা ৰায়ত এইদৰে কয়। সর্বোচ্চ আদালতে কয় যে হিন্দু উত্তৰাধিকাৰী আইনৰ ৮ নম্বৰ ধাৰাৰ অধীনত ককাৰ সম্পত্তিত নাতিৰ প্ৰত্যক্ষভাৱে জন্মগত অধিকাৰ নাথাকে। প্রথমে সম্পত্তি প্রথম শ্ৰেণীৰ উত্তৰাধিকাৰীসকললৈ হস্তান্তৰ, ভাগ-বাটোৱাৰা হোৱাৰ পাছত পিতৃৰ (ককাৰ পুত্ৰ বা নাতিৰ পিতৃ) ভাগত পৰা সম্পত্তিৰ অংশ তেওঁৰ ব্যক্তিগত সম্পতি হ'ব। এনে অৱস্থাত ককাকৰ সম্পত্তিত নাতিৰ কোনো জন্মগত অধিকাৰ নাথাকে। 

ন্যায়াধীশ আগষ্টিন জর্জ মছিহা আৰু ন্যায়াধীশ সুনীতা অগ্ৰৱালৰ বিচাৰপীঠে এই ৰায় দিয়ে। বিচাৰপীঠে এই ৰায় দিয়ে এজন পুত্ৰই দাখিল কৰা আৱেদনৰ শুনানি লৈ। আদালতে পুত্ৰৰ আৱেদন অগ্রাহ্য কৰি এইৰায় দিয়ে। উক্ত আবেদনত পুত্ৰজনে এটা সম্পত্তিৰ আধা অংশ বিচাৰি দাবী উত্থাপন কৰিছিল, এই অংশটো তেওঁৰ পিতৃয়ে ককাকৰ সম্পত্তি ভাগ-বাটোৱাৰা হোৱাৰ পাছত লাভ কৰিছিল। পাছত পিতৃয়ে এই সম্পত্তি বিক্ৰী কৰি দিয়ে। আদালতৰ মতে, যেতিয়া ককাকৰ সম্পত্তিৰ ভাগ-বাটোৱাৰা হয় তেতিয়া পিতৃয়ে ইয়াৰ অংশ লাভ কৰে আৰু এই সম্পত্তি পিতৃৰ ব্যক্তিগত হৈ পৰে। 

ভাগ-বাটোৱাৰৰ পাছত যৌথ পৰিয়াল ব্যৱস্থাৰ অন্ত পৰে আৰু সকলো উত্তৰাধিকাৰী নিজৰ নিজৰ অংশৰ স্বতন্ত্র মালিক হৈ পৰে। যিহেতু এই সম্পত্তি পিতৃৰ ব্যক্তিগত সম্পত্তি হৈ পৰে, সেয়েহে ইয়াত নাতিৰ কোনো জন্মগত অধিকাৰ নাথাকে আৰু তেওঁৰ পিতৃ জীৱিত থকা অৱস্থাত ইয়াৰ ভাগ-বাটোৱাৰাৰ দাবীও কৰিব নোৱাৰে।

উৎস: দৈনিক জনমভূমি