ডিজিটেল ডেস্কঃ দেশত বিৰোধী ঐক্যৰ কথা চলি থকাৰ মাজতে সমাগত লোকলভা নিৰ্বাচনত আপৰ বিৰুদ্ধে দিল্লীত প্ৰাৰ্থী থিয় কৰোৱাৰ সিদ্ধান্ত লৈছে কংগ্ৰেছে। দিলল্লী প্ৰদেশ কংগ্ৰেছ কমিটীয়ে (ডিপিচিচি) লোকসভা নিৰ্বাচনত দিল্লীত আম আদমী পাৰ্টিৰ (আপ) সৈতে যুঁজ দিয়াৰ কথা চিন্তা কৰিছে ।
দিল্লী প্ৰদেশ কংগ্ৰেছ কমিটীয়ে (ডিপিচিচি) শেহতীয়াকৈ এনে প্ৰস্তাৱৰ কথা বিবেচনা কৰা বুলি জানিব পৰা গৈছে। আপে বিৰোধী মিত্ৰজোঁটত নাথাকে বুলি এক প্ৰকাৰ স্থিতি স্পষ্ট কৰাৰ পিছতেই কংগ্ৰেছে এনে ধৰণৰ সিদ্ধান্ত গ্ৰহণ কৰা বুলি ধাৰণা কৰা হৈছে। ফলত বিৰোধী মিত্ৰজোঁটলৈ আপ অহাৰ সম্ভাৱনা একেবাৰে নোহোৱা হ’ল বুলি বহুতে আলোচনা কৰিছে।
অৱশ্যে কংগ্ৰেছৰ এটা সূত্ৰই প্ৰকাশ কৰা মতে এই সিদ্ধান্ত এতিয়াও চূড়ান্ত কৰা হোৱা নাই। হাইকমাণ্ডে ভোটৰ আগতে চূড়ান্ত সিদ্ধান্ত ল'ব বুলি সূত্ৰটোৱে কয়। কংগ্ৰেছে দিল্লীৰ সাতখন লোকসভা আসনত আপৰ সৈতে কোনো বুজাবুজি নকৰিব বুলি আন এটা সূত্ৰই প্ৰকাশ কৰিছে। দিল্লীত কংগ্ৰেছ আৰু আপৰ মাজৰ সম্পৰ্ক এতিয়া অহি-নকুল সম্পৰ্কলৈ পৰ্যবসিত হৈছে। কংগ্ৰেছৰ এটা অংশই এতিয়াও বিশ্বাস কৰে যে আপৰ জন্ম কংগ্ৰেছক ৰাজনৈতিকভাৱে ধ্বংস কৰিবলৈ হৈছিল।
পঞ্জাৱ বিধানসভা নিৰ্বাচনৰ পিছৰে পৰা আপৰ সৈতে কংগ্ৰেছৰ তিক্ততা বৃদ্ধি পাইছে। কেজৰিৱালৰ দলে কংগ্ৰেছক উৎখাত কৰিছিল আৰু পঞ্জাৱ দখল কৰিছিল।উল্লেখ্য দিল্লীত আপে বিধানসভা নিৰ্বাচনত জয়ী হৈছিল কিন্তু যোৱা লোকসভা নিৰ্বাচনত দিল্লীৰ সাতখন লোকসভা আসনতে বিজেপিৰ হাতত পৰাজিত হৈছিল। এনে পৰিস্থিতিত কংগ্ৰেছৰ সৈতে মিত্তৰতা কৰিলে লোকসভা নিৰ্বাচনত দিল্লীত আপ লাভৱান হোৱাৰ আশা আছে বুলিও বহুতে মন্তব্য কৰিছে।
Continue Reading
