ডিজিটেল ডেস্কঃ যিটো সময়ত ভাৰতৰ স্বাস্থ্য সেৱাৰ অভূতপূৰ্ব উন্নয়ন হোৱা বুলি বিভিন্ন মহলে প্ৰচাৰ চলাই আহিছে সেই সময়তে বিশ্ব স্বাস্থ্য সংস্থাৰ প্ৰতিবেদনত পোহৰলৈ আহিছে এক ভয়াৱহ তথ্য ৷ প্ৰতিবেদন খনত কোৱা হৈছে যে বিশ্বত ভাৰতীয়সকলৰ মাজতে যক্ষ্মা ৰোগীৰ সংখ্যা সৰ্বাধিক।
বিশ্ব স্বাস্থ্য সংস্থাই প্ৰকাশ কৰা প্ৰতিবেদন অনুসৰি ২০২২ চনত ভাৰতত ২৮.২ লাখ লোক যক্ষ্মা ৰোগত আক্ৰান্ত হৈছিল । এয়া সমগ্ৰ বিশ্বত আক্ৰান্ত মুঠ যক্ষ্মা ৰোগীৰ ২৭ শতাংশ। ১৯৯৫ চনত বিশ্ব স্বাস্থ্য সংস্থাই প্ৰথমে বিশ্বজুৰি যক্ষ্মা ৰোগৰ তালিকা প্ৰকাশ কৰা আৰম্ভ কৰিছিল। দেখা গৈছে যে ২০২২ চনত বিশ্বত সৰ্বাধিক সংখ্যক লোক এই ৰোগত আক্ৰান্ত হৈছিল।
শেহতীয়াকৈ প্ৰকাশিত প্ৰতিবেদন অনুসৰি ২০২২ চনত বিশ্বজুৰি ৭.৫ নিযুত লোক যক্ষ্মা ৰোগত আক্ৰান্ত হৈছিল৷ ইয়াৰ ভিতৰত, ৮৭ শতাংশ লোক ৩০ খন দেশৰ। ভাৰত তালিকাৰ শীৰ্ষত আছে (২৭ শতাংশ)। ৰোগত আক্ৰান্ত লোকৰ দিশৰ পৰা আন আঠখন দেশ হৈছে ইণ্ডোনেছিয়া (১০ শতাংশ), চীন (৭.১ শতাংশ), ফিলিপাইনছ (৭ শতাংশ), পাকিস্তান (৫.৭ শতাংশ), নাইজেৰিয়া (৪.৫ শতাংশ), বাংলাদেশ (৩.৬ শতাংশ) আৰু কঙ্গো (৩ শতাংশ)।
প্ৰতিবেদনখনত এইবুলিও কোৱা হৈছে যে ভাৰতত ১২ শতাংশ যক্ষ্মা ৰোগীৰ অৱস্থা সংকটজনক। যোৱা বছৰ ভাৰতত যক্ষ্মা ৰোগত আক্ৰান্ত হৈ ৩.৪২ লাখ লোকৰ মৃত্যু হৈছিল। অৱশ্যে, মহামাৰীৰ পিছৰ সময়ছোৱাত যক্ষ্মা ৰোগীৰ ৰোগমুক্তিৰ পৰিসংখ্যাই কিছু সকাহ প্ৰদান কৰিছে। ২০২০-২১ বৰ্ষত ভাৰত, ইণ্ডোনেছিয়া আৰু ফিলিপাইনছত যক্ষ্মা ৰোগৰ পৰা আৰোগ্য হোৱা লোকৰ সংখ্যা ৬০ শতাংশতকৈও অধিক।
Continue Reading
