বিশ্বকাপ জয় কৰিবলৈ আমি অষ্ট্ৰেলিয়ালৈ অহা নাই! ভাৰতৰ স’তে মুখামুখিৰ পূৰ্বে এইদৰে ক’লে বাংলাদেশৰ অধিনায়কে

ডিজিটেল ডেস্কঃ বিশ্বকাপ জয় কৰিবলৈ বাংলাদেশে অষ্ট্ৰেলিয়ালৈ যোৱা নাই! যদিহে ভাৰতক বাংলাদেশে পৰাস্ত কৰে, তেন্তে এয়া অঘটনহে হ’ব। নিজেই এই ভাষ্য প্ৰদান কৰিছে বাংলাদেশৰ অধিনায়ক ছাকিব উল হাছানে।

টি২০ বিশ্বকাপত ভাৰত আৰু বাংলাদেশে বুধবাৰে মুখামুখি হ’ব। এডিলেইডত হ’ব লগা মেচখনৰ প্ৰাকমুহূৰ্তত ছাকিব উল হাছানে

সাংবাদিকৰ স’তে হোৱা মুখামুখিত কয় যে প্ৰত্যেকখন মেচেই বাংলাদেশৰ বাবে গুৰুত্বপূৰ্ণ আৰু প্ৰতিখন মেচতে সৰ্বোচ্চ প্ৰদৰ্শন উজাৰি দিবলৈ দলে বিচাৰে।

''আমি খেলত সৰ্বোৎকৃষ্ট দলীয় প্ৰদৰ্শন আগবঢ়োৱাৰ লক্ষ্য ৰাখিছো। কোনো দলক আমি লক্ষ্য কৰি লোৱা নাই। প্ৰত্যেকখন মেচেই আমাৰ বাবে গুৰুত্বপূৰ্ণ।’’- তেওঁ কয়।

''আমাৰ বাকী থকা দুখন মেচ ভালদৰে খেলিব বিচাৰো। যদি কেনেবাকৈ আমি ভাৰত অথবা পাকিস্তানৰ বিৰুদ্ধে জিকো, তেন্তে ই হ’ব এটা অঘটন।’’- ছাকিব উল হাছানে কয়- ''আমি দেখিছো যে আয়াৰলেণ্ড আৰু জিম্বাবুৱেৰ দৰে দলে ইংলেণ্ড আৰু পাকিস্তানক হৰুৱাইছে। অনুৰূপ অঘটন আমিও ঘটাব পাৰো।’’

''ভাৰতে বিশ্বকাপ জয় কৰিবলৈ অষ্ট্ৰেলিয়ালৈ আহিছে। কিন্তু বাংলাদেশে বিশ্বকাপ জয় কৰিবলৈ ইয়ালৈ অহা নাই।’’- ভাৰতৰ শক্তিশালী দলীয় প্ৰদৰ্শনৰ বিষয়ে ছাকিব উল হাছানে কয়- ''কিন্তু আমি অঘটন ঘটাবলৈ সৰ্বোচ্চ প্ৰদৰ্শন উজাৰি দিম।’’

কথা প্ৰসংগত তেওঁ ভাৰতৰ সূৰ্যকুমাৰ যাদৱকো প্ৰশংসা কৰে। কয় যে ভাৰতৰ হৈ সূৰ্যকুমাৰে অনবদ্য প্ৰদৰ্শন কৰি আহিছে। ভাৰতত কেইবাজনো বিশ্বশ্ৰেষ্ঠ খেলুৱৈ আছে বুলিও তেওঁ কয়।

উল্লেখ্য যে গ্ৰুপ২ত বৰ্তমান শক্তিশালী স্থিতিত আছে দুয়োটা দল। তিনিখন মেচ খেলি দুয়োটা দলেই লাভ কৰিছে ৪ পইণ্ট। মেচখনত জিকিলে ভাৰত অথবা বাংলাদেশে বিশ্বকাপৰ ছেমিফাইনেলত উপনীত হোৱাৰ সম্ভাৱনা বৃদ্ধি পাব।