ভাৰত বনাম বাংলাদেশঃ ন’ বলক কেন্দ্ৰ কৰি কোহলী আৰু ছাকিবৰ মাজত সৃষ্টি হ’ল উত্তপ্ত পৰিস্থিতিৰ

ডিজিটেল ডেস্কঃ এডিলেইডত চলি থকা ভাৰত-বাংলাদেশৰ মেচখনৰ মাজভাগতে বিশ্ব ক্ৰিকেটৰ দুজন অগ্ৰণী তাৰকাৰ মাজত উত্তপ্ত পৰিস্থিতিৰ সৃষ্টি হোৱা দেখা গ’ল। সংঘাতত লিপ্ত হয় বিৰাট কোহলী আৰু ছাকিব উল হাছান। মেচখনত ভাৰতে বেটিং কৰাৰ থকাৰ সময়ত আম্পায়াৰৰ এটি ন’ বলৰ সিদ্ধান্তত বিতৰ্কৰ সৃষ্টি হয়।

উক্ত সিদ্ধান্তটোৰ ফলতে বাংলাদেশৰ অধিনায়ক ছাকিবৰ স’তে মনোমালিন্য ঘটে বিৰাটৰ। অৱশ্যে শেষত দুয়োজন তাৰকাই হাস্যবদনে দুয়োকে অভিবাদন জনায়।

ভাৰতৰ ইনিংছৰ ১৫ তম অভাৰত বলিং কৰিছিল হাছান মেহমদুদে। অভাৰৰ শেষৰ বলটোত হাছানে বিৰাট কোহলীলৈ এটা বাউন্সাৰ দিছিল। কোহলীয়ে কোনো ৰকমে বলটোত বেট লগাবলৈ সক্ষম হয়। লগে লগে আম্পায়াৰে ন’ বলৰ ইংগিত দিয়ে।

তাতেই আপত্তি জনায় ছাকিবে। বাংলাদেশৰ অধিনায়কগৰাকীয়ে আম্পায়াৰৰ ওচৰলৈ আহি কথা পাতে। তাৰপাছতে আম্পায়াৰৰ স’তে কথা পাতে বিৰাট কোহলীয়ে। কোহলীয়ে ছাকিবক বুজাবলৈ ধৰে যে আম্পায়াৰৰ সিদ্ধান্ত সঠিক সিদ্ধান্ত। অৱ্শ্যে কিছু সময় পৰিস্থিতি উত্তপ্ত হৈ থকাৰ পাছতে দুয়ো সহমতত উপনীত হয়। কোনোধৰণৰ বাক-বিতণ্ডাৰ সৃষ্টি নহ’ল।

উল্লেখ্য যে প্ৰথম ইনিংছত ভাৰতে ২০ অভাৰত ১৮৪ ৰাণ সংগ্ৰহ কৰিছে। ইয়াৰ মূলতে আছিল বিৰাট কোহলী আৰু কে এল ৰাহুলৰ অৰ্ধ শতক। এওঁলোকৰ উপৰিও সূৰ্যকুমাৰ যাদৱ আৰু ৰবীচন্দ্ৰন অশ্বিনেও মাৰমুখী বেটিঙেৰে উজ্বলি উঠে।