বিশ্বকাপ ক্ৰিকেটঃ এটা বলত ১৩ ৰাণ! অসম্ভৱক সম্ভৱ কৰিলে নিউজিলেণ্ডৰ মিছেল ছাণ্টনাৰে, কেনেকৈ?

সোমবাৰে অনুষ্ঠিত বিশ্বকাপৰ খেলখনত এই অসম্ভৱক সম্ভৱ কৰি তুলিলে বাওঁহাতৰ বেটছমেনগৰাকীয়ে। সেইয়াও নিউজিলেণ্ডৰ ইনিংছৰ একেবাৰে অন্তত। নেদাৰলেণ্ডৰ বাছ ডে লিড আছিল বলাৰ। তেওঁ এটা ফুলটছ বল কৰে। ছান্টনাৰৰ কোনো সমস্যা নাছিল। তেওঁ ছয় মাৰে। বলটো কঁকালৰ উচ্চতাৰ ওপৰত থকাৰ বাবে লেগ আম্পায়াৰে ন’ বল বুলি ক’লে। ফলত নিউজিলেণ্ডৰ স্ক’ৰবৰ্ডত ৭ ৰান সংযোজন হয়। লগতে নিউজিলেণ্ডে ফ্ৰী হিট পায়। লিডে সেই বলটোও ফুলটচ কৰে। আচলতে নেদাৰলেণ্ডৰ বলাৰজনে ইয়ৰ্কাৰ ডেলিভাৰী দিবলৈ চেষ্টা কৰিছিল। ছান্টনাৰে সেই বলটোও পিছপৰা পইণ্ট অঞ্চলৰ মাজেৰে খেলপথাৰৰ বাহিৰলৈ পঠিয়াইছিল। আকৌ ছয় মাৰে। ফলত ছান্টনাৰে মাত্ৰ এটা বৈধ বলৰ পৰা দলটোৰ হৈ ১৩ ৰান সংগ্ৰহ কৰে। তেওঁ নিজৰ বাবে ১২ ৰান সংগ্ৰহ কৰে।

সোমবাৰে নিউজিলেণ্ডৰ জয়ত গুৰুত্বপূৰ্ণ ভূমিকা পালন কৰিছিল ছান্টনাৰে। বেটেৰে ১৭টা বলত ৩৬ ৰানৰ অপৰাজিত ইনিংছ খেলাৰ উপৰিও বলৰ সৈতেও তেওঁ নিজৰ দক্ষতা প্ৰমাণ কৰিলে। ১০ অভাৰত বলিং কৰি ৫৯ ৰানত ৫ উইকেট দখল কৰে। নেদাৰলেণ্ডৰ বিৰুদ্ধে তেওঁ আছিল নিউজিলেণ্ডৰ সফল বলাৰ। লগতে লাভ কৰে মেন অৱ দ্য মেচৰ বঁটা।