ডিজিটেল ডেস্কঃ আজি অভিযান আৰম্ভ কৰিব ক্ৰিষ্টিয়ানো ৰোণাল্ডো আৰু নেইমাৰে। লিঅ’নেল মেছিৰ পাছত কাটাৰ বিশ্বকাপত একেদিনাই নিজৰ নিজৰ প্ৰথমখন মেচ খেলিবলৈ সাজু হৈছে ফুটবল জগতৰ শীৰ্ষ তাৰকা দুগৰাকীয়ে।
বিশ্বকাপৰ প্ৰথম মেচত গ’ল কৰিবলৈ সক্ষম হ’লেও দলক জয়ী কৰিবলৈ সক্ষম নহ’ল মেছি। সেয়ে অনুৰাগীসকলৰ মাজত চৰ্চা চলিছে যে ৰোণাল্ডো-নেইমাৰে পাৰিবনে দলক জয়ী কৰিব!
ক্ৰিষ্টিয়ানো ৰোণাল্ডোৰ পৰ্তুগালে প্ৰথমখন মেচত অৱতীৰ্ণ হ’ব ঘানাৰ বিৰুদ্ধে। সম্প্ৰতি ৰোণাল্ডো আৰু মানচেষ্টাৰ ইউনাইটেডৰ মাজত ব্যাপক সংঘাত চলি আছে। চৰ্চাত আছে বিষয়টো। তেনে পৰিস্থিতিত তাৰকাগৰাকীয়ে বিশ্বকাপত কি প্ৰদৰ্শন আগবঢ়ায় লক্ষ্যণীয় হ’ব।
ফুটবল বিশ্বকাপৰ এগৰাকী অভিজ্ঞ তাৰকা হিচাপে ৰোণাল্ডোৱে এতিয়ালৈকে ১৭ খন মেচ খেলিছে। কৰিছে ৭ টা গ’ল। ইয়াৰ ভিতৰত আছে ২০১৮ চনত ৰাছিয়া বিশ্বকাপৰ প্ৰথমখন মেচত স্পেইনৰ বিৰুদ্ধে কৰা দুৰ্দান্ত হেট্ৰিক।
আনহাতে, নেইমাৰে ব্ৰাজিলৰ হৈ মাত্ৰ দুখন বিশ্বকাপ খেলিছে। ২০১৪ চনৰ ব্ৰাজিল বিশ্বকাপত উজ্বলি উঠিছিল তাৰকাগৰাকী। কৰিছিল চাৰিটাকৈ দৃষ্টিনন্দন গ’ল। কিন্তু কোৱাৰ্টাৰ ফাইনেলত কলম্বিয়াৰ বিৰুদ্ধে নামি আঘাটপ্ৰাপ্ত হোৱাত চেমিফাইনেলত অৱতীৰ্ণ হ’ব পৰা নাছিল।
২০১৮ চনৰ বিশ্বকাপত নেইমাৰে দুটা গ’ল কৰিছিল। কিন্তু নিজৰ দলক কোৱাৰ্টাৰ ফাইনেলৰ পৰা আগুৱাই নিবলৈ সক্ষম হোৱা নাছিল। সেয়ে এইবাৰৰ বিশ্বকাপত নেইমাৰে কি ভূমিকাত অৱতীৰ্ণ হয় সেয়া লক্ষ্যণীয় হৈ পৰিছে।
আজি চাৰ্বিয়াৰ বিৰুদ্ধে প্ৰথমখন মেচত নামিব নেইমাৰৰ ব্ৰাজিল। নেইমাৰৰ উপৰিও ব্ৰাজিলৰ কেইবাজনো তাৰকাই ইতিমধ্যে দৃষ্টি আকৰ্ষণ কৰিছে। গেব্ৰিয়েল জিচুচ, ভিনিচিয়াছ জুনিয়ৰ, ৰিচাৰ্লছনৰ দৰে কেইবাগৰাকীও নতুন তাৰকাৰ খেল চাবলৈ দৰ্শকসকল ৰৈ আছে।
Continue Reading
