বিশ্বত আমেৰিকাক গুৰুত্বহীন কৰাৰ প্ৰক্ৰিয়া আৰম্ভ: বলিৰ পঠা হৈছে নেকি ইউক্ৰেইন?

ডিজিটেল ডেস্ক: বিশ্বৰ মানচিত্ৰত আমেৰিকাক গুৰুত্বহীন কৰি তোলাৰ প্ৰচেষ্টা চলি আছে৷ ৰাছিয়াই ইউক্ৰেইনক আক্ৰমণ কৰি আওপকীয়াকৈ সকীয়নি দিছে আমেৰিকাক৷ আমেৰিকাৰ আধিপত্যবাদী মনোভাব আৰু বিদেশ ৰাষ্ট্ৰৰ আভ্যন্তৰীণ বিষয়তো অনধিকাৰ প্ৰৱেশে আমেৰিকা বিশ্বৰ চকুত হেয় হৈ পৰিছে৷ নেটো গোটৰ শক্তিৰে বলীয়ান হৈ থকা আমেৰিকাৰ বিৰুদ্ধে নীৰৱে একত্ৰিত হৈছে চীন আৰু ৰাছিয়া৷ ৰাছিয়াৰ আগ্ৰাসী স্থিতিয়ে কূটনৈতিক ক্ষেত্ৰত আমেৰিকাৰ স্থিতিৰ প্ৰতি আনিছে তীব্ৰ প্ৰত্যাহ্বান৷ ৰাছিয়াৰ ৰাষ্ট্ৰপতি ভ্লাডিমীৰ পুটিনে ইউক্ৰেইনৰ ভূখণ্ডলৈ সৈন্য স্থানান্তৰ কৰি দেশখনত ব্যাপক আক্ৰমণ আৰম্ভ কৰাৰ লগে লগে ৰাষ্ট্ৰপতি জো বাইডেনে নিন্দা, অৰ্থনৈতিক নিষেধাজ্ঞা আৰু মস্কোৰ বিৰুদ্ধে থিয় দিবলৈ আমেৰিকা যুক্তৰাষ্ট্ৰৰ মিত্ৰশক্তিক সমবেত কৰাৰ প্ৰচেষ্টাক সঁহাৰি জনাইছে। কিন্তু, বাইডেনে বিকল্প পথৰ সন্ধান দিবলৈ অনিচ্ছুক হৈ আছে৷ যেনে, ইউক্ৰেইনত ৰাছিয়ান বাহিনীৰ বিৰুদ্ধে যুঁজিবলৈ আমেৰিকান সৈন্য প্ৰেৰণ কৰা নাই জো বাইডেনে৷ শেষ মুহূৰ্তত ইউক্ৰেইনক সামৰিক সকাহ প্ৰদান কৰা নাই আমেৰিকাই৷ অথচ, আমেৰিকাই যুদ্ধৰ প্ৰাৰম্ভিক পৰ্যায়ত ইউক্ৰেইনৰ পক্ষত অৱস্থান কৰি ৰাছিয়াক যুদ্ধৰ বাবে উচতাই আছিল৷ আৰু, এতিয়া ৰাছিয়াই যুদ্ধ আৰম্ভ কৰাৰ পাছত আমেৰিকাই এখোজ আগুৱাই পিছুৱাইছে৷ আমেৰিকা যুক্তৰাষ্ট্ৰৰ জনসাধাৰণে ইউৰোপৰ মানচিত্ৰত বিচাৰি পোৱা এখন দেশৰ ওপৰত যুদ্ধত জড়িত হ’বলৈ অনিচ্ছুক। ৰাছিয়া আৰু আমেৰিকা যুক্তৰাষ্ট্ৰ দুয়োখন পাৰমাণৱিক শক্তি, যাৰ ফলত বিশ্বযুদ্ধৰ আশংকা বৃদ্ধি পাইছে। বাইডেনৰ শেহতীয়া স্থিতিৰ সমালোচকসকলে কয় যে, বাইডেনে সামৰিক বিকল্পটো জীয়াই ৰাখিলে কি বিকল্প ইতিহাস উদ্ভৱ হ’ব পাৰে তাৰ সঠিক মূল্যাংকন কৰাটো অসম্ভৱ। ইপিনে, ৰাষ্ট্ৰসংঘৰ বিষয়াসকলে ইউক্ৰেইনত শান্তি স্থাপনৰ আহ্বান জনাইছে৷ ইপিনে, ৰাছিয়াৰ আক্ৰমণত অসহায় হৈ পৰা ইউক্ৰেইনৰ ৰাষ্ট্ৰপতি ভলোডিমিৰ জেলেনস্কিয়ে কয় যে, তেওঁলোকে অকলে তেওঁলোকৰ দেশক ৰক্ষা কৰি আছে। ক্যীয়েভৰ ৰাজধানীত ৰাছিয়াৰ এক অভিযানৰ পাছত বক্তব্য ৰাখি জেলেনস্কিয়ে কয় যে, বিশ্বই এতিয়াও দূৰৰ পৰাহে ইউক্ৰেইনৰ ঘটনাসমূহ পৰ্যবেক্ষণ কৰি আছে। আজি পুৱাও আমি অকলে আমাৰ দেশক সুৰক্ষা দিছোঁ। কালিৰ দৰেই, পৃথিৱীৰ আটাইতকৈ শক্তিশালী দেশসমূহে দূৰৰ পৰা চাই আছিল৷ ৰাছিয়াক কালি নিষেধাজ্ঞাৰ দ্বাৰা আঘাত কৰা হৈছিল, কিন্তু এই বিদেশী সৈন্যসকলক আমাৰ মাটিৰ পৰা আঁতৰাবলৈ এইবোৰ যথেষ্ট নহয়। কেৱল সংহতি আৰু সংকল্পৰ জৰিয়তেহে এয়া সম্ভৱ বুলি ইউক্ৰেইনৰ ৰাষ্ট্ৰপতিগৰাকীয়ে মন্তব্য কৰে৷