ডিজিটেল ডেস্কঃ উচ্চ শিক্ষিত হৈও যে কামৰ সৰু-বৰ বিচাৰ কৰিব নালাগে, সেই কথাই প্ৰমাণ কৰিছে এইগৰাকী যুৱতীয়ে৷ দিল্লীৰ ২১ বছৰীয়া তাপসী উপাধ্যায়ে বি টেক পঢ়া শেষ কৰি চাকৰি নাপাই ফুচকা ষ্টল খুলিছে। তাপসীয়ে মানুহক স্বাস্থ্যকৰ ফুচকা খুৱাবলৈ সিদ্ধান্ত লৈছে৷
তেলত ভজাৰ সলনি তাপসীৰ কাষলে গ’লে গ্ৰাহকে এয়াৰ ফ্ৰাইয়াৰত ফুচকা ভাজি পাব। দিল্লীস্থিত তাপসীয়ে কেৱল ফুচকাই নহয়, অধিক ধৰণৰ স্বাস্থ্যসন্মত জলপান নিজৰ ষ্টলত থাকিব বিচাৰে।
শেহতীয়াকৈ ছ’চিয়েল মিডিয়াত এটা ভিডিঅ’ ভাইৰেল হৈছে য’ত দেখা গৈছে যে তাপসীয়ে বুলেট বাইক চলাই আছে আৰু বুলেটখনৰ পিছফালে ইনফ্লেটেবল ষ্টল আছে।
এটা সাক্ষাৎকাৰত তাপসীয়ে কয়- ‘‘বহুতে মোক দেখি কয় যে এই কাম মহিলাৰ লগত খাপ নাখায়। ছোৱালীয়ে ৰাজপথত ফুচকা বিক্ৰী কৰাটো নিৰাপদ নহয়। কিন্তু মানুহৰ কথা মই নুশুনো।’’
তাপসীৰ ফুচকা দোকানখনৰ নাম ৰখা হৈছে ‘বিটেক পানীপুৰীৱালি’। ছোৱালীজনীৰ এই ভিডিঅ’ ভাইৰেল হোৱাৰ পিছত বহুতে তাইৰ শুভ কামনা কৰে। এজন নেটিজেনে লিখিছে, "কোনো কামেই সৰু নহয়, আপুনি যি কৰিছে সেয়া ভালকৈয়ে কৰা হৈছে।"
Continue Reading
