ডিজিটেল ডেস্কঃ বিবাহস্থলীতে দৰা-কইনাৰ কাজিয়া। এই কাজিয়াৰ ফলতে দৰাই বিহপান কৰি আত্মহত্যা কৰে। কইনাৰ অৱস্থাও সংকটজনক বুলি জানিব পৰা গৈছে। মধ্য প্ৰদেশৰ ইন্দোৰ চহৰত সংঘটিত হৈছে এই হৃদয়বিদাৰক ঘটনা।
ঘটনাৰ সন্দৰ্ভত স্থানীয় আৰক্ষী বিষয়া ৰমজান খানৰ ভাষ্য অনুসৰি, ইন্দোৰ চহৰৰ কানাডিয়া অঞ্চনৰ আৰ্য সমাজ মন্দিৰত বিবাহপাশত আৱদ্ধ হ'বলৈ উপস্থিত হৈছিল দুয়োগৰাকী যুৱক-যুৱতী। দৰাৰ বয়স ২১ বছৰ আৰু কইনাৰ বয়স ২০ বছৰ।
বিয়া চলি থকাৰ মাজতে দুয়োগৰাকীৰ মাজত কাজিয়াৰ সূত্ৰপাত হয়। এই কাজিয়াৰ ফলতে দৰাই বিহপান কৰি মৃত্যুক সাবটি লয়। । কইনাগৰাকীয়ে এই কথা গম পাই নিজেও অৱশিষ্ট বিহপান কৰি অসুস্থ হৈ পৰে। লৰালৰিকৈ আত্মীয়ই দুয়োকে নিকটৱৰ্তী চিকিৎসালয়লৈ লৈ যায় যদিও চিকিৎসকে ইতিমধ্যে দৰাৰ মৃত্যু হোৱা বুলি ঘোষণা কৰে। কমকৈ বিহপান কৰিলেও বিহৰ তীব্ৰতা অধিক হোৱাৰ বাবে কইনাগৰাকীৰো অৱস্থা সংকটজনক বুলি উল্লেখ কৰিছে আৰক্ষীয়ে। কইনাক বৰ্তমান লাইফ চাপৰ্ট চিষ্টেমত ৰখা হৈছে।
এই সন্দৰ্ভত দৰাৰ পৰিয়ালে আৰক্ষীক দিয়া ভাষ্য অনুসৰি, কেইবাদিনৰে পৰাই হেনো দৰাক বিয়াৰ বাবে তাগিদা দি আছিল কইনাগৰাকীয়ে। দৰাই কেৰিয়াৰৰ ভিত্তিত বিয়াৰ বাবে দুবছৰৰ সময়সীমা বিচৰাত যুৱতীগৰাকীয়ে আৰক্ষী থানাত এজাহাৰ দাখিল কৰিছিল। ঘটনা সন্দৰ্ভত আৰক্ষীয়ে তদন্ত অব্যাহত ৰাখিছে। বিহপানৰ সেইয়াও এক কাৰণ হ'ব পাৰে বুলি সন্দেহ কৰিছে আৰক্ষীয়ে ।
Continue Reading
