ডিজিটেল ডেস্কঃ বহু মানুহেই বিয়াঘৰৰ ৰসগোল্লালে বৰ হেঁপাহ কৰে। গৃহস্থইও বিয়াৰ অতিথিক ৰসগোল্লা খুৱাই ভালপায়। পাছে এখন বিয়াত ৰসগোল্লা খাই বিপদত পৰিল নিমন্ত্ৰিত অতিথি। বিয়াৰ ৰসগোল্লা খাই চিকিৎসালয়ত ভৰ্তি হ’ল ৭০ গৰাকীকৈ অতিথি। উত্তৰ প্ৰদেশৰ কনৌজত সংঘটিত হৈছে এই দুখজনক ঘটনা।
কনৌজৰ এখন গাঁৱত বিয়াৰ ভোজত খাদ্য গ্ৰহণ কৰি ৰসগোল্লা খাই অসুস্থ হৈ পৰে শিশুসহ প্ৰায় ৭০ গৰাকী লোক। কেওজনকে চিকিৎসালয়ত ভৰ্তি কৰা হৈছে।
মঙলবাৰে সন্ধিয়া মঢ়হাৰপুৰ নামৰ এখন গাঁৱত অনুষ্ঠিত হৈছিল এই ছাদাৱ আৰু ৱলিমাৰ বিবাহ অনুষ্ঠান। নিমন্ত্ৰিত অতিথিসকলে খাদ্য গ্ৰহণ কৰাৰ পাছতে অস্বাভাৱিক ধৰণে অসুস্থ হৈ পৰে। ইয়াকে লৈ বিয়াঘৰত হাহাকাৰ লাগে।
ৰসগোল্লা খোৱা প্ৰায় ৭০ গৰাকী লোকৰ বমি আৰু ডায়েৰিয়া হয়। প্ৰথমে এজন-দুজনৰ এনেকুৱা হোৱাৰ পাছত পাছলৈ ৭০ জন লোকৰ বমি আৰু ডায়েৰিয়াৰ বাবে দৌৰাদৰি লাগে।
লগে লগে অসুস্থ লোকসকলক জিলা চিকিৎসালয়ত ভৰ্তি কৰাৰ লগতে আন একাংশ লোকক ব্যক্তিগত চিকিৎসালয়লৈ লৈ যোৱা হয়। সম্প্ৰতি আটাইকেইগৰাকী লোকেই সুস্থ হৈ উঠিছে। ফুড পইজনিঙৰ বাবে এনেকুৱা হোৱা বুলি জনায় চিকিৎসকে।
Continue Reading
