ডিজিটেল ডেস্কঃ মনে বিচৰা কইনা এগৰাকীক বিচাৰি যোৱা পাঁচ বছৰে হায়ৰাণ হৈছে এগৰাকী যুৱক। পেছাত তেওঁ অভিযন্তা। জনা মতে স্বভাৱ -চৰিত্ৰও ভাল। কিন্তু আজিলৈকে বিচাৰি পোৱা নাই এগৰাকী জীৱন সংগী। কইনা বিচাৰি যুৱক জনে বাতৰি কাকততো বিজ্ঞাপন দিছিল, কিন্তু কোনো কামত নাহিল।বিবাহ সম্পৰ্কীয় ছাইটতো তেওঁ বিজ্ঞাপন দি সুফল পোৱা নাই। ইমান খিনি কৰাৰ পিছতো জীৱন সংগী বিচাৰি নোপোৱাত স্বাভাৱিকতে হতাশ হৈ পৰিছে যুৱক জন।
সেয়েহে এইবাৰ তামিলনাডুৰ অভিযন্তাজনে কইনা বিচৰাৰ এক অভিনৱ পদ্ধতি অৱলম্বন কৰিছে।সেইমৰ্মে তেওঁ কইনা বিচৰাৰ পোষ্টাৰ ছপাই সমগ্ৰ মাদুৰাই চহৰতে পোষ্টাৰ লগাই দিছে। ’মোক এজনী কইনা’ লাগে বুলি উল্লেখ কৰি ছপা কৰা পোষ্টাৰবোৰ এতিয়া মাদুৰাইৰ অলিয়ে-গলিয়ে ওলমি থকা দেখা গৈছে।
কইনা বিচাৰি হাবাথুৰি খোৱা অভিযন্তা যুৱকজনৰ নাম এম এছ জগন । মাদুৰাইৰ ভিলাপুৰমৰ বাসিন্দা যুৱ জনৰ বয়স ২৭ বছৰ। পেছাত অভিযন্তা কইনা বিচাৰি আঁৰি দিয়া পোষ্টাৰখনত লিখা আছে, "মই মিছ ৰাইটক বিচাৰো "। পোষ্টাৰ খনত জগনৰ নাম, ধাম, পিতৃৰ পৰিচয়, গোত্ৰ,চাকৰি, দৰমহা আৰু আনকি পছন্দ আৰু অপছন্দবোৰো লিখা হৈছে। লগতে পোষ্টাৰত নিজৰ এখন ছবিও প্ৰকাশ কৰিছে। জগনে সমগ্ৰ চহৰখনতে এনে বিলবৰ্ড, হৰ্ডিং, বেনাৰ লগাইছে।
তেওঁৰ কাৰ্যত চহৰখনৰ মানুহৰ চকু থৰ লাগিছে।
কইনা বিচাৰি পোৱা জ্বালাৰ কথা উল্লেখ কৰি জগনে কয়, "মই যোৱা পাঁচ বছৰ ধৰি জীৱন সংগী বিচাৰি আছো। কিন্তু মই আজিলৈকে পোৱা নাই।মই মোৰ মনৰ মানুহগৰাকী বিচাৰি পোৱা নাই বাবে হতাশো হৈছো। গতিকে মই এই পথ ল’লো। মোক বহুতে হাঁহি আছে। তেওঁলোকে মোক ট্ৰ'ল কৰি আছে। কিন্তু সেইটো মোৰ বাবে গুৰুত্বপূৰ্ণ কথা নহয়।মই জীৱন সংগী পামেই বুলি আত্মবিশ্বাসী। "মই আশা কৰোঁ যে বিবাহযোগ্য ছোৱালী বা কইনাসকলৰ পৰিয়ালে মোক ফোন কৰি যোগাযোগ কৰিব । "
উল্লেখ্য যোৱা দশকত, পশ্চিমীয়া দেশবোৰত বিলবৰ্ড, পোষ্টাৰ লগাই সঙ্গী বিচাৰি উলিওৱাৰ প্ৰৱণতা দেখা গৈছিল। কিন্তু ভাৰতত এনে ঘটনা আগতে ঘটাৰ কথা হয়তো কাৰো মনত নপৰিব। মাদুৰাইৰ যুৱকজনে এই ক্ষেত্ৰত নতুন নজিৰ সৃষ্টি কৰিলে বুলি বহুতে আলোচনা কৰিছে।
Continue Reading
