বলীউড অভিনেত্ৰীৰ বিৰুদ্ধে ষড়যন্ত্ৰ কাৰ? ৰশ্মিকা মান্দন্নাৰ পাছত কাজলৰ মৰ্ফড ভিডিঅ’ ভাইৰেল

ডিজিটেল ডেস্ক: ৰশ্মিকা মান্দন্নাৰ পাছত এইবাৰ কাজল দেৱগণ৷ সম্পাদিত ভিডিঅ’ই জোকাৰিছে বলীউড৷ বলীউডৰ অভিনেত্ৰী কাজলৰ পোছাক সলনি কৰি সম্পাদনা কৰা ভিডিঅ’ এটাক ভুৱা বুলি ইতিমধ্যে চিনাক্ত কৰা হৈছে। ফেচবুক, এক্স (পূৰ্বতে টুইটাৰ) আৰু ইউটিউবৰ দৰে মুখ্য ছ’চিয়েল মিডিয়া প্লেটফৰ্মত ভাইৰেল হৈ পৰা হোৱা ভিডিঅ’টো অভিনেত্ৰীগৰাকীৰ নহয়, কিন্তু এগৰাকী সামাজিক মাধ্যমৰ প্ৰভাৱশালী ব্যক্তিৰ। 

কিছুদিন পূৰ্বে আন এগৰাকী জনপ্ৰিয় অভিনেত্ৰী ৰশ্মিকা মান্দন্নাৰ ভিডিঅ’ ভাইৰেল হোৱাৰ পাছত ‘ডিপফেক’ৰ বৰ্ধিত উদ্বেগৰ মাজত এই নতুন ভিডিঅ’টো ভাইৰেল হৈ পৰিছে৷

তথ্য পৰীক্ষা কৰা প্লেটফৰ্ম বুমৰ মতে, মূল ভিডিঅ’টো এজন সামাজিক মাধ্যমৰ প্ৰভাৱশালী ব্যক্তিৰ আছিল আৰু কাজলৰ মুখখন ভিডিঅ’টোত ৰূপান্তৰিত কৰা হৈছিল। মৰ্ফ কৰা ডিপফেক ভিডিঅ’টোত মাত্ৰ অলপ সময়ৰ বাবে মূল মহিলাগৰাকীৰ মুখখন দৃশ্যমান হয়। প্ৰতিবেদনত দাবী কৰা হৈছে যে মূল ভিডিঅ’টো ৫ জুনত টিকটকত আপলোড কৰা হৈছিল।

ডিপফেক— পৰ্ণগ্ৰাফী সৃষ্টি কৰিবলৈ আৰু ভুল তথ্য প্ৰচাৰ কৰিবলৈ ক্ৰমান্বয়ে ব্যৱহাৰ কৰা হৈছে এই মাধ্যম। এই মাধ্যমে নাগৰিক সমাজৰ বাবে গুৰুত্বপূৰ্ণ প্ৰত্যাহ্বানৰ সৃষ্টি কৰিছে। বলীউডৰ অভিনেত্ৰী ৰশ্মিকা মান্দান্নাৰ ঘটনাটোৰ পাছত ভাৰত চৰকাৰে মুখ্য ছ’চিয়েল মিডিয়া প্লেটফৰ্মসমূহক এক পৰামৰ্শ জাৰি কৰে আৰু তেওঁলোকক এনে ভিডিঅ’ৰ বিৰুদ্ধে তৎক্ষণাৎ ব্যৱস্থা ল’বলৈ আৰু ভুল তথ্য বিয়পোৱা সমল আঁতৰাবলৈ আহ্বান জনায়। ছ’চিয়েল মিডিয়া প্লেটফৰ্মসমূহক অভিযোগ দাখিল কৰাৰ ৩৬ ঘণ্টাৰ ভিতৰত এনে সমল আঁতৰাবলৈ কোৱা হৈছে।

‘বিজনেছ টুডে’ই এনে ঘটনাৰে মোকাবিলা কৰিবলৈ ব্যৱহাৰ কৰিব পৰা আইনী পদ্ধতিবোৰ বুজিবলৈ চাইবাৰ সুৰক্ষা প্ৰতিষ্ঠান ভয়েজাৰ ইনফোছেকৰ সঞ্চালক জিতেন জৈনৰ সৈতে কথা পাতিছিল। তেওঁ পৰামৰ্শ দিছে যে আইপিচি আৰু আইটি নিয়মবোৰ কেৱল ‘ষ্টপগেপ’ ব্যৱস্থা আৰু মৰ্ফিঙৰ সমস্যাৰ মোকাবিলা কৰিবলৈ পৰ্যাপ্ত নহয়। তেওঁ কয়, আমাক তথ্য প্ৰযুক্তি আইনৰ এক সম্পূৰ্ণ ব্যাপক পৰিৱৰ্তনৰ প্ৰয়োজন, য’ত এই প্ৰযুক্তি কোনে ব্যৱহাৰ কৰিব পাৰে, কি উদ্দেশ্যত ইয়াক ব্যৱহাৰ কৰিব পাৰি, ইয়াক অনুজ্ঞাপত্ৰ দিয়া হ’ব লাগে, ভিডিঅ’ সৃষ্টি কৰা ব্যক্তিজনৰ দায়িত্ব কি আৰু এনে প্লেটফৰ্মৰ দায়িত্ব কি- এই সকলো কথা বিবেচনা কৰিব লাগে৷ সম্প্ৰতি বিদ্যমান নিয়মবোৰ এইক্ষেত্ৰত পৰ্যাপ্ত নহয়। আমাক এক বিস্তৃত এ.আই. নিয়ন্ত্ৰণ আইনৰ প্ৰয়োজন বুলি জৈনে কয়।

কনচিৰাছ নামৰ লণ্ডনৰ এটা ছফ্টৱেৰ কোম্পানীৰ প্ৰযুক্তি উপদেষ্টা আৰু চিটিঅ’ বিনোদ কে সিঙে লোকসকলক সতৰ্ক হ’বলৈ, বিভিন্ন স্থানৰ পৰা তথ্য পৰীক্ষা কৰিবলৈ আৰু প্ৰৱঞ্চনা পৰিহাৰ কৰিবলৈ ইণ্টাৰনেটত সাৱধান হ’বলৈ পৰামৰ্শ দিয়ে। তেওঁ বিশ্বাস কৰে যে এইক্ষেত্ৰত চৰকাৰে কঠোৰ আইন প্ৰস্তুত কৰা উচিত আৰু এনে ভুৱা তথ্যৰ বিৰুদ্ধে যুঁজিবলৈ প্ৰযুক্তি ব্যৱহাৰ কৰা উচিত। তেওঁ দাবী কৰে যে প্ৰযুক্তি প্ৰতিষ্ঠানসমূহে তেওঁলোকৰ প্লেটফৰ্ম আৰু সেৱাসমূহৰ অপব্যৱহাৰ বন্ধ কৰিবলৈ উন্নত উপায়েৰে বিনিয়োগ কৰা উচিত।