ব্লেক মেজিক! আত্মাৰ ভয় দেখুৱাই স্বয়ম্ভু তান্ত্ৰিকে জংঘলত কিশোৰীক কৰিলে বলাৎকাৰ, মাতৃও গ্ৰেপ্তাৰ

ডিজিটেল ডেস্কঃ ‘ব্লেক মেজিক’-শুনিলেই ভয় লগা এটি শব্দ! ব্লেক মেজিকৰ কাহিনী আমি টেলিভিছনৰ পৰ্দাত বহুবাৰ দেখিছো৷ বহু কাহিনী কিতাপে-পত্ৰই পঢ়িবও পাইছো৷ কিন্তু কিতাপে-পত্ৰই পঢ়িব পৰা এই কাহিনী সঁচা হ’লে কিমান ভয়ানক হ’ব পাৰে মানুহৰ জীৱন, সেয়া আমি হয়তো কল্পনাও কৰা নাই৷ ঠিক তেনেদৰে ব্লেক মেজিকৰ জৰিয়তে বহুজনৰ ওপৰত নিজৰ স্বাৰ্থসিদ্ধি কৰাৰ কাহিনীও ভিন্ন ওলাব৷ তেনে এক কৰুণ ঘটনাৰ সাক্ষী হ’ল সমগ্ৰ দেশ৷ মহাৰাষ্ট্ৰৰ থানে জিলাৰ ভিৱান্দিত এগৰাকী স্ব-ঘোষিত গডমেনে ব্লেক মেজিকৰ আসোঁৱাহ লৈ ধৰ্ষণ কৰিলে এগৰাকী কিশোৰীক৷ জানিব পৰা মতে, ১৬ বছৰীয়া এগৰাকী কন্যাক ৰোগ নিৰাময়ৰ বাবে নিজ মাতৃয়ে এগৰাকী স্ব-ঘোষিত গডমেনৰ ওচৰলৈ লৈ গৈছিল৷ আৰু লম্পট গডমেনে ৰোগ নিৰাময়ৰ অজুহাতত মাতৃৰ অনুমতি লৈ ঘন জংঘলত কিশোৰীগৰাকীক বলাৎকাৰ কৰে৷ ভুক্তভোগী কিশোৰীগৰাকীয়ে ইয়াৰ সন্দৰ্ভত নাৰপলি আৰক্ষীৰ ওচৰত অভিযোগ দাখিল কৰে৷ লগে লগে স্বয়ম্ভু গডমেন বুলি চিনাকী দিয়া ভণ্ড তান্ত্ৰিকৰ লগতে মহিলাগৰাকীক গ্ৰেপ্তাৰ কৰে আৰক্ষীয়ে৷

অভিযোগকাৰীৰ বৰ্ণনা অনুসৰি, কিশোৰীগৰাকীৰ ডিঙিৰ তীব্ৰ বিষ হৈছিল আৰু অভিযুক্তজনে দাবী কৰিছিল যে, এজন মৃত খুৰাকৰ ভূতে ধৰি ৰাখিছিল৷ আনহাতে, এই ভূতক খেদি কিশোৰীগৰাকীক আৰোগ্য কৰিব পাৰিব বুলিও বিশ্বাস দিছিল লম্পটজনে। লগতে মাতৃৰ পৰামৰ্শ লৈ এখন জংঘললৈ নিছিল ভুক্তভোগী কিশোৰীগৰাকীক আৰু তাৰ-পাছতেই উপৰ্যুপৰি ধৰ্ষণ কৰিছিল লম্পট তান্ত্ৰিকটোৱে। এই সমগ্ৰ ঘটনা পোহৰলৈ অহাৰ পাছতেই অঞ্চলজুৰি সৃষ্টি হয় তীব্ৰ চাঞ্চল্যই৷

মাতৃগৰাকীৰ লগতে লম্পটজনৰ ওপৰত আইপিচিৰ ধৰা সন্নিবিষ্ট কৰিছে৷ লগতে ‘POCSO’ আইন আৰু মহাৰাষ্ট্ৰ মানৱ বলিদান প্ৰতিৰোধ আৰু নিৰ্মূল আৰু অন্যান্য অমানৱীয়, দুষ্ট আৰু অঘোৰী প্ৰথা আৰু ক’লা যাদু আইনৰ অধীনত অভিযুক্ত কৰা হৈছে।