ডিজিটেল ডেস্কঃ মাৰাঠী চিনেমাৰ প্ৰখ্যাত অভিনেতা তথা পৰিচালক ৰবীন্দ্ৰ মহাজনীৰ আকস্মিক দেহাৱসান। মৃত্যুৰ সময়ত ৰবীন্দ্ৰৰ বয়স আছিল ৭৭ বছৰ। জানিব পৰা মতে, পুনেৰ তালেগাওঁ দভাদেৰ আম্বি অঞ্চলত থকা তেওঁৰ ফ্লেটত উদ্ধাৰ হৈছে অভিনেতাজনৰ মৃতদেহ। দুই তিনিদিন পূৰ্বে তেওঁৰ মৃত্যু হোৱা বুলি প্ৰাথমিক তদন্তত প্ৰকাশ কৰিছে আৰক্ষীয়ে।
যোৱা কেইমাহমানৰ পৰা ভাড়াতীয়া ফ্লেটত অকলে বাস কৰিছিল ৰবীন্দ্ৰ মহাজনীয়ে। বিগত আঠ মাহ ধৰি তেওঁ অকলে আছিল। কিন্তু শুকুৰবাৰে সন্ধিয়া হঠাতে তেওঁৰ ঘৰৰ পৰা এটা বেয়া গোন্ধ আহিবলৈ ধৰিলে। ইয়াৰ পিছত তেওঁৰ ওচৰ-চুবুৰীয়াই এই বিষয়ে আৰক্ষীক অৱগত কৰে। আৰক্ষীয়ে দুৱাৰ ভাঙি ঘৰত প্ৰৱেশ কৰাৰ সময়তে অভিনেতাজনক মৃত অৱস্থাত উদ্ধাৰ কৰে। সকলো পৰিস্থিতি চোৱাৰ পিছত আৰক্ষীৰ প্ৰাথমিক হিচাপ অনুসৰি ২-৩ দিন আগতে তেওঁৰ মৃত্যু হৈছিল। ৰবীন্দ্ৰৰ পৰিয়ালক তেওঁৰ মৃত্যুৰ খবৰ দিয়া হয়। বৰ্তমান তেওঁৰ মৃতদেহ মৰণোত্তৰ পৰীক্ষাৰ বাবে প্ৰেৰণ কৰা হৈছে।
অভিনেতা ৰবীন্দ্ৰ মহাজনীৰ মৃত্যুৰ খবৰে স্তম্ভিত কৰি তুলিছে উদ্যোগটোৰ লগতে তেওঁৰ পৰিয়ালৰ লোকক। হিন্দী ধাৰাবাহিক ‘ইমলি’ত কাম কৰা অভিনেতা গশ্মীৰ মহাজনীৰ পিতৃ আছিল ৰবীন্দ্ৰ মহাজনী। ৰবীন্দ্ৰই মাৰাঠী চিনেমাৰ লগতে হিন্দী চলচ্চিত্ৰতো কাম কৰিছিল। তেওঁক মাৰাঠী চলচ্চিত্ৰ জগতৰ বিনোদ খান্না বুলিও কোৱা হৈছিল, কাৰণ তেওঁৰ ব্যক্তিত্ব আৰু চেহেৰা দুয়োটা বিনোদ খান্নাৰ সৈতে মিল আছিল। অভিনয়ৰ সমান্তৰালকৈ ৰবীন্দ্ৰই বহু মাৰাঠী ছবিও পৰিচালনা কৰিছিল।
Continue Reading
