ডিজিটেল ডেস্কঃ যোৱা কেইদিনমানত বিলাহীৰ দামে আকাশ চুইছে। বহু ধনী লোকেও কেৱল দামৰ বাবেই বিলাহী খোৱা বাদ দিছে। এনে সময়তে মহাৰাষ্ট্ৰৰ এজন কৃষক ৰাতিটোৰ ভিতৰতে কোটিপতি হৈ পৰিছে। কৃষকগৰাকীয়ে তেওঁৰ ১৮ একৰ মাটিত বিলাহীৰ খেতি কৰিছিল।
পুত্ৰ আৰু বোৱাৰীৰ লগ লাগি তুকাৰাম ভগোজী গয়াকৰ নামৰ কৃষকগৰাকীয়ে কেতিয়াও ভবা নাছিল যে কেৱল বিলাহী বিক্ৰী কৰিয়েই তেওঁ মাহটোৰ ভিতৰতে কোটিপতি হ’ব পাৰিব। মহাৰাষ্ট্ৰৰ পুনেৰ কৃষকজনে জুলাই মাহত বিলাহী বিক্ৰী কৰি কোটিপতি হৈ পৰিছে।
জুলাই মাহত হঠাতে দেশত বিলাহীৰ মূল্য দ্ৰুতগতিত বৃদ্ধি পায়। দেশৰ বহু ঠাইত বিলাহীৰ মূল্য প্ৰতি কিলোগ্ৰামত ২০০ টকা পৰ্যন্ত হয়গৈ। বিলাহীৰ দাম হঠাৎ বৃদ্ধি হোৱাৰ ফলত তুকাৰামৰ কপাল হ’ল। তেওঁ যোৱা এমাহত বিলাহী বিক্ৰী কৰি ১.৫ কোটি টকা উপাৰ্জন কৰিছে।
তুকাৰামে কয় যে তেওঁ যোৱা এমাহত ১৩,০০০ বাকচ বিলাহী বিক্ৰী কৰিছে। বজাৰত বিলাহীউচ্চ মূল্যত বিক্ৰী কৰা হৈছে। তেওঁ দাবী কৰে যে তেওঁ প্ৰতি বছৰে তেওঁৰ পথাৰত বিলাহী খেতি কৰে। কিন্তু কোনো বাৰেই ইমান লাভ হোৱা নাছিল।
তুকাৰামে কয় যে তেওঁ বিলাহী বিক্ৰী কৰি কেৱল শুক্ৰবাৰেই ১৮ লাখ টকা উপাৰ্জন কৰিবলৈ সক্ষম হৈছে। এদিনত ৯০০ বাকচ বিলাহী বিক্ৰী কৰা হৈছে। প্ৰতিটো বাকচৰ মূল্য হৈছে ২,১০০ টকা।
ইফালে দেশত বিলাহীৰ মূল্য হ্ৰাস হোৱাৰ কোনো লক্ষণ দেখা যোৱা নাই। ইয়াৰ পৰিৱৰ্তে মূল্য দিনে দিনে বাঢ়িহে গৈছে। এনেদৰে দাম বাঢ়ি গৈ থাকিলে অহা সপ্তাহত বিলাহীৰ মূল্যই প্ৰতি কিলোগ্ৰামত ৩০০ টকা অতিক্ৰম কৰাৰ সম্ভাৱনা আছে।
Continue Reading
