ডিজিটেল ডেস্কঃ বিহাৰৰ বেগুছৰাইৰ মুণ্ডন অনুষ্ঠানত অংশগ্ৰহণ কৰিবলৈ যোৱা পাঁচজন যুৱকৰ গা ধুই থকা অৱস্থাত গংগা নদীত ডুব গৈ মৃত্যু হয়। স্থানীয় ডুবাৰুৰ সহায়ত উদ্ধাৰ হৈছে পাঁচজন যুৱকৰ মৃতদেহ।
সমগ্ৰ ঘটনা সংঘটিত হৈছে চকীয়া থানা এলেকাৰ অন্তৰ্গত ছিমৰিয়া গংগা ঘাটত। জানিব পৰা মতে, বৰাউনীৰ বাসিন্দা ৰাজু শ্বাহৰ পুত্ৰই সোমবাৰে মুণ্ডন সংস্কাৰ পাতিছিল। এই মুণ্ডনত অংশগ্ৰহণ কৰিবলৈ তেওঁৰ পৰিয়ালৰ লোক আৰু আন মানুহ ছিমৰিয়ালৈ গৈছিল।
গংগাত গা ধুবলৈ গৈ ৬ জন যুৱক অতি দ পানীত সোমাইছিল। এই সময়ছোৱাত এজন যুৱক পানীত ডুব যাবলৈ ধৰিলে। সকলো বন্ধুৱে তেওঁক বচাবলৈ গ’ল। ফলত আটাইকেইজন নদীত ডুব যায়। ৫ জনেই মৃত্যুক সাৱটি লয়। আনহাতে, এজন যুৱকক ডুবাৰুৱে ৰক্ষা কৰিলে।
নিহতসকলৰ ভিতৰত আছে সনু শ্বাহৰ দুই পুত্ৰ ৰোহিত কুমাৰ আৰু বাবু চাহেবৰ লগতে চন্দন ৰামৰ পুত্ৰ দূত্য কুমাৰ, প্ৰকাশ মিশ্ৰৰ পুত্ৰ ওম মিশ্ৰ আৰু অধিকাৰ সাহৰ পুত্ৰ অজয় কুমাৰ।
ঘটনাৰ তথ্য পোৱাৰ লগে লগে চকীয়া আৰক্ষী সেই স্থানত উপস্থিত হৈ সকলো মৃতদেহ নিজৰ জিম্মাত লৈ মৰণোত্তৰ পৰীক্ষাৰ বাবে সদৰ হাস্পতাল বেগুছৰাইলৈ প্ৰেৰণ কৰে। একেলগে পাঁচজন যুৱকৰ মৃত্যুৰ বাবেই গাঁওখনত শোকৰ পৰিৱেশৰ সৃষ্টি হৈছে।
Continue Reading
