ডিজিটেল ডেস্কঃ ভাৰতীয় হকী দলটোৱে দেশবাসীক এক অনন্য উপহাৰ দিলে। হৰমনপ্ৰীত সিঙৰ নেতৃত্বত ভাৰতীয় দলটোৱে অলিম্পিকত একেৰাহে দ্বিতীয়বাৰৰ বাবে ব্ৰঞ্জৰ পদক লাভ কৰে। ২০২৪ চনৰ পেৰিছ অলিম্পিকত ব্ৰঞ্জৰ পদক মেচত ভাৰতে স্পেইনক ২-১ গ’লত পৰাস্ত কৰিছিল। ভাৰতৰ হৈ দুয়োটা গ’ল দিয়ে অধিনায়ক হৰমনপ্ৰীত সিঙে। স্পেইনৰ হৈ একমাত্ৰ গ’লটো দিলে মাৰ্ক মিৰালেছে।
ভাৰতীয় দলটোৱে ৫২ বছৰৰ পাছত হকীত বেক টু বেক পদক লাভ কৰে। অৱশ্যে এই জয়ৰ পাছত ভাৰতীয় অধিনায়ক হৰমনপ্ৰীত সিঙক বৰ বেছি সুখী যেন দেখা নগ’ল। তেওঁ দেশবাসীৰ ওচৰত ক্ষমা বিচাৰিলে।
খেলৰ অন্তত সম্প্ৰচাৰকৰ সৈতে কথা পাতি হৰমনপ্ৰীত সিঙে কয়- ‘‘আমি নিশ্চিতভাৱে ব্ৰঞ্জৰ পদক লাভ কৰিছো। কিন্তু আমি স্বৰ্ণ পদক লাভ কৰাৰ যোগ্য আছিলোঁ। স্বৰ্ণ পদক লাভ কৰিব নোৱাৰাৰ বাবে দেশবাসীৰ ওচৰত ক্ষমা বিচাৰিছো। আমি যৎপৰোনাস্তি চেষ্টা কৰিলোঁ আৰু সুখী যে দেশখন খালী হাতলৈ ঘূৰি অহা নাই।’’
হৰমনপ্ৰীত সিঙে দেশবাসীক বিশেষ আহ্বান জনায়। তেওঁ কয় যে আমি হকীৰ স্তৰ বৃদ্ধি কৰিবলৈ চেষ্টা কৰিছো আৰু বিচাৰো যে মানুহে এই খেলখনক অধিক ভাল পাওক। হৰমনপ্ৰীত সিঙে কয়, ‘আমি হকীৰ স্তৰ বৃদ্ধিৰ বাবে বহুত চেষ্টা কৰিছো। আমি আমাৰ খেলখন উন্নত কৰাৰ বাবে অহৰহ চেষ্টা কৰি আছো। আমি বিচাৰো যে দেশবাসীয়ে হকীক অধিক ভাল পাওক কাৰণ আমাক আপোনালোকৰ সহায়ৰ বহুত প্ৰয়োজন। আমি জানো যে আপুনি হকী ভাল পায় আৰু আমি দেশৰ বাবে যিমান পাৰো পদক লাভ কৰাৰ চেষ্টা কৰিম।’’
গ’লৰক্ষক পি আৰ শ্ৰীজেশৰ বিদায়ক লৈ হৃদয়স্পৰ্শী কথা ক’লে হৰমনপ্ৰীত সিঙে। তেওঁ কয়, ‘আমি জানো যে আমাৰ আটাইতকৈ শক্তিশালী বিন্দুটো হ’ল গ’লপোষ্টৰ ওচৰৰ ডিফেন্স। এইখন আমাৰ ৱাল শ্ৰীজেশৰ শেষ মেচ। আমাৰ দলৰ বহু খেলুৱৈৰ অভিজ্ঞতা তেওঁৰ বয়সৰ সমান। এই দলটোৰ বাবে শ্ৰীজেশে বহু কাম কৰিছে। পদক লাভ কৰাত দলটো যিমানেই সুখী, শ্ৰীজেশৰ বিদায়ত ই সমানেই আৱেগিক হৈ পৰিছে।’’
অধিনায়ক হৰমনপ্ৰীত সিঙে পি আৰ শ্ৰীজেশক কান্ধত লৈ ষ্টেডিয়ামত ঘূৰি ফুৰি অনুৰাগীৰ শুভেচ্ছা গ্ৰহণ কৰে। শ্ৰীজেশে নিজৰ অন্তিমখন মেচত উজ্জ্বল প্ৰদৰ্শন আগবঢ়াই ভাৰতৰ জয়ত গুৰুত্বপূৰ্ণ ভূমিকা পালন কৰিছিল।
Continue Reading
