বৰপেটাৰ বিএইচ মহাবিদ্যালয়ত নিৰ্বাচনকেন্দ্ৰিক সংঘাত: আছু, এনএছইউআই, এবিভিপিৰ মাজত আক্ৰমণ, প্ৰত্যাক্ৰম

ডিজিটেল ডেস্ক: ৰাজ্যত ছাত্ৰ ৰাজনীতিয়ে পুনৰ ধাৰণ কৰিছে উত্তপ্ত পৰিস্থিতি৷ অলপতে ডিব্ৰুগড় জিলাৰ অন্তৰ্গত ‘ডিব্ৰু মহাবিদ্যালয়’ত হৈ যোৱা ছাত্ৰ একতা সভাৰ নিৰ্বাচনত দুই দলৰ মাজত হোৱা ঘটনাই হিংসাত্মক ৰূপ ধাৰণ কৰিছিল৷ আহত হৈছিল কেইবাজনো ছাত্ৰ প্ৰতিনিধি৷ তাৰ মাজতে বৰপেটাৰোডৰ ‘বিএইচ মহাবিদ্যালয়’ৰ ছাত্ৰ একতা সভাৰ নিৰ্বাচনতো দেখিবলৈ পোৱা গ’ল নিৰ্বাচনকেন্দ্ৰিক সংঘাত৷

বৰপেটা জিলাৰ ‘বিএইচ মহাবিদ্যালয়’ত ছাত্ৰ একতা সভাৰ নিৰ্বাচনক কেন্দ্ৰ কৰি আছু, এবিভিপি আৰু এনএছইউআই কৰ্মীৰ মাজত সংঘাতৰ সৃষ্টি হয়৷ এনএছইউআই কৰ্মীয়ে একাংশ আছু সমৰ্থক ছাত্ৰ-ছাত্ৰীক আক্ৰমণ কৰাৰ অভিযোগ উত্থাপিত হয়৷ আনকি একাংশ ছাত্ৰী আহত হোৱাৰ লগতে অশালীন ব্যৱহাৰ কৰাৰো অভিযোগ তোলে ছাত্ৰ-ছাত্ৰীয়ে৷

জানিব পৰা মতে, কাইলৈ অনুষ্ঠিত হ’ব বিএইচ মহাবিদ্যালয়ৰ ছাত্ৰ একতা সভাৰ নিৰ্বাচন৷ নিৰ্বাচনী প্ৰচাৰ চলাই থকাৰ সময়তে এবিভিপি আৰু আছুৰ কৰ্মীসকলে নিজৰ সমৰ্থকক লগত লৈ ভোটৰ প্ৰচাৰ চলাই থকাৰ সময়তে এনএছইউআইৰ কৰ্মীসকলে ছাত্ৰ-ছাত্ৰীসকলৰ ওপৰত জঁপিয়াই পৰাৰ অভিযোগ তুলিছে৷ ইপিনে এনএছইউআইৰ হৈ মহাবিদ্যালয়ৰ বাহিৰৰ ছাত্ৰই প্ৰচাৰ কৰা আৰু আক্ৰমণৰ ঘটনাত জড়িত হৈ পৰাৰো অভিযোগ একাংশ শিক্ষাৰ্থীৰ৷