ডিজিটেল ডেস্কঃ ডিপ্ৰেছনৰ বাবে কৰ’না মহামাৰীৰ সময়ত বহুতে আত্মহত্যা কৰিছিল। হোৰা হোৰে আত্মহত্যাৰ খবৰ আহিছিল প্ৰতিদিনে। লকডাউনৰ সময়ত গৃহবন্দীত্বৰ সময়ছোৱাতো হতাশ হৈ পৰিছিল বহুতে। হতাশাৰ এই ছবিবোৰ বিভিন্ন সময়ত চৰ্চা লাভ কৰা দেখা গৈছে। মানসিক স্বাস্থ্যৰ ক্ষেত্ৰত সাৱধান হ’বলৈ বিশেষজ্ঞসকলে বাৰে বাৰে পৰামৰ্শ দি আহিছে। এইবাৰ বিশ্ব স্বাস্থ্য সংস্থাৰ এক প্ৰতিবেদনে পুনৰ বৃদ্ধি কৰিছে উদ্বেগ।
বিশ্ব স্বাস্থ্য সংস্থাৰ প্ৰতিবেদন অনুসৰি, কৰ’নাৰ বাবে প্ৰথম বছৰত হতাশা আৰু উদ্বিগ্নতাত ভুগি থকা লোকৰ সংখ্যা ২৫ শতাংশতকৈ অধিক বৃদ্ধি পাইছে। কৰ'না অতিমাৰীক বিশ্বৰ বৃহৎ সংকট বুলিও অভিহিত কৰিছে সংস্থাটোৱে। আৰ্থ-সামাজিক ক্ষেত্ৰতো কৰ’না মহামাৰীৰ ব্যাপক প্ৰভাৱ পৰা পৰিলক্ষিত হোৱা বুলি সদৰী কৰিছে। এই অতিমাৰীৰ ফলত যুৱক-যুৱতী, মহিলা আদি মানসিক ৰোগত ভুগিছে। ২০১৯ চনত ১ বিলিয়ন লোক, অৰ্থাৎ বিশ্বৰ প্ৰতি আঠজন লোকৰ ভিতৰত এজনৰ মানসিক ৰোগ হৈছিল।'
প্ৰতিবেদনত আৰু কোৱা হৈছে যে, যৌন নিৰ্যাতন আৰু শিশুৰ ওপৰত হোৱা নিৰ্যাতন হতাশাৰ অন্যতম প্ৰধান কাৰণ। তদুপৰি যুদ্ধ আৰু জলবায়ু সংকটৰ দৰে পৰিস্থিতিক হতাশাৰ কাৰণ হিচাপে উল্লেখ কৰা হৈছে। মানসিক স্বাস্থ্য অভিযানৰ সংখ্যা বৃদ্ধি হোৱাৰ পাছতো বিভিন্ন দেশৰ চৰকাৰে ইয়াৰ বাবে বিশেষ ধন ব্যয় কৰা নাই বুলিও প্ৰতিবেদনত প্ৰকাশ পাইছে।
Continue Reading
