ডিজিটেল ডেস্কঃ বৃহস্পতিবাৰেই গ্ৰেপ্তাৰ হ’ব পাৰে দিল্লীৰ মুখ্যমন্ত্ৰী অৰবিন্দ কেজৰিৱাল । আম আদমী পাৰ্টীৰেই শীৰ্ষ নেত্ৰী এগৰাকীয়ে এই আশংকা ব্যক্ত কৰিছে। আপৰ শীৰ্ষ নেত্ৰী আতিশীয়ে কয় যে মুখ্যমন্ত্ৰী কেজৰিৱালক বৃহস্পতিবাৰে আবকাৰী নীতি গোচৰত গ্ৰেপ্তাৰ কৰাৰ সম্ভাৱনা আছে।তেওঁ কেন্দ্ৰীয় সংস্থাসমূহে আক্ৰোশমূলকভাবে গ্ৰহণ কৰা পদক্ষেপৰ প্ৰতিবাদ জনাবলৈ ইণ্ডিয়া মিত্ৰজোঁটৰ অংশীদাৰসকলৰ সমৰ্থন বিচাৰিছে। আতিশীয়ে কয় যে কেন্দ্ৰই ইচ্ছাকৃতভাৱে ইণ্ডিয়া মিত্ৰতাক লক্ষ্য কৰি লৈছে। এই সকলোবোৰ ৰাজনৈতিক প্ৰতিহিংসাৰ বাবে কৰা হৈছে।
আতিশীয়ে দাবী কৰে যে তেওঁলোকৰ ওচৰত তথ্য আছে যে অৰবিন্দ কেজৰিৱালক বৃহস্পতিবাৰে গ্ৰেপ্তাৰ কৰা হ'ব পাৰে। কেজৰিৱালক গ্ৰেপ্তাৰৰ পৰিকল্পনা কেন্দ্ৰীয় সংস্থাৰ দ্বাৰা প্ৰস্তুত কৰা হৈছে বুলিও তেওঁ কয় । তেওঁ দাবী কৰিছিল যে অৰবিন্দ কেজৰিৱালক গ্ৰেপ্তাৰ কৰাৰ পিছত কেন্দ্ৰই ইণ্ডিয়া এলায়েন্সৰ আন নেতাসকলক লক্ষ্য কৰি ল’ব। ইয়াৰ পিছত তেজস্বী যাদৱ, হেমন্ত সোৰেন, পিনাৰাই বিজয়নক লক্ষ্য কৰা হ'ব পাৰে বুলিও তেওঁ মন্তব্য কৰে।
গতিকে ইণ্ডিয়া মিত্ৰজোঁটৰ নেতাসকলে সাজু হৈ থাকিব লাগিব বুলিও তেওঁ কয়।উল্লেখ্য প্ৰৱৰ্তন সঞ্চালকালয়ে (ইডি) আবকাৰী নীতিৰ গোচৰৰ সন্দৰ্ভত ২ নৱেম্বৰত দিল্লীৰ মুখ্যমন্ত্ৰী অৰবিন্দ কেজৰিৱালক মাতি পঠিয়াইছে। কেজৰিৱালক বৃহস্পতিবাৰে ইডিৰ নতুন দিল্লীৰ কাৰ্যালয়ত হাজিৰ হ'বলৈ কোৱা হৈছে।
যদিও যোৱা বছৰ আগষ্টত পঞ্জীয়ন কৰা আবকাৰী গোচৰৰ প্ৰথম খন এজাহাৰত দিল্লীৰ মুখ্যমন্ত্ৰীৰ নাম নাছিল, কেজৰিৱালৰ নাম অভিযোগপত্ৰত উল্লেখ কৰা হৈছিল বুলি জানিব পৰা গৈছে। কেজৰিৱালক যোৱা বছৰ এপ্ৰিলত চিবিআইয়ে এবাৰ মাতি পঠিয়াইছিল। তেওঁক এতিয়া ইডিয়ে মাতি পঠিয়াইছে।মনীষ চিছোদিয়া, সঞ্জয় সিং আৰু সত্যেন্দ্ৰ জৈনকে ধৰি কেইবাজনো আপ নেতা ইতিমধ্যে গোচৰটোত সাঙোৰ খাই কাৰাগাৰত আছে। এইবাৰ কেজৰিৱালক লক্ষ্য কৰা হৈছে বুলি আতিশীয়ে আশংকা ব্যক্ত কৰে।
Continue Reading
