ডিজিটেল ডেস্কঃইৰাণত অপ্ৰতিৰোধ্য গতিত চলি আছে হিজাব বিৰোধী প্ৰতিবাদ। দেশ খনৰ আৰক্ষী আৰু সেনাই প্ৰতিবাদকাৰীৰ বিৰুদ্ধে কঠোৰৰ পৰা কঠোৰতম পদক্ষেপ গ্ৰহণ কৰিছে।ইমানৰ পিছতো শাম কটা নাই প্ৰতিবাদ। এতিয়ালৈকে আৰক্ষীৰ গুলীত তিনিশৰো অধিক প্ৰতিবাদকাৰী নিহত হৈছে। ইৰানৰ নিৰাপত্তা বাহিনীয়ে প্ৰতিবাদকাৰীক লাঠি আৰু বন্দুকেৰে নিয়ন্ত্ৰণ কৰিব নোৱাৰি এইবাৰ এক নিকৃষ্ট পন্থা গ্ৰহণ কৰিছে।
শেহতীয়াকৈ প্ৰকাশিত এক প্ৰতিবেদন অনুসৰি ইৰানৰ সেনা আৰু আৰক্ষীয়ে প্ৰতিবাদকাৰী নিৰস্ত্ৰ মহিলাসকলক তেওঁলোকৰ মুখ, স্তন আৰু যৌনাঙ্গত শ্বটগানেৰে গুলীয়াবলৈ আৰম্ভ কৰিছে। এনে বৰ্বৰ পন্থাৰে ইৰানৰ চৰকাৰে প্ৰতিবাদী মহিলা-যুৱতীসকলক প্ৰতিবাদৰ পথৰ পৰা আঁতৰাই নিব বিচাৰিছে।
দ্য গাৰ্ডিয়ানে গুলীৰ আঘাত পোৱা মহিলা তথা চিকিৎসকসকলৰ উদ্ধৃতি দি প্ৰতিবেদন প্ৰকাশ কৰিছে।
আমেৰিকা যুক্তৰাষ্ট্ৰৰ সংবাদ মাধ্যমে প্ৰকাশ কৰা কৰা ছবিবোৰত দেখা গৈছে যে ডজন ডজন সৰু "শ্বট" বল বহু প্ৰতিবাদী মহিলাৰ মাংসৰ গভীৰলৈ সোমাই গৈছে। ইৰানৰ আৰক্ষীয়ে প্ৰতিবাদী পুৰুষসকলক তেওঁলোকৰ ভৰি, নিতম্ব আৰু পিঠিত গুলী মাৰি আহিছে।
"মই ২০ বছৰ বয়সৰ এগৰাকী মহিলাৰ চিকিৎসা কৰিছিলো। তেওঁক তেওঁৰ যৌনাঙ্গত গুলীয়াই হত্যা কৰা হৈছিল। আন দহটা গুলী তেওঁৰ উৰুত লাগিছিল ," এজন চিকিৎসকৰ উদ্ধৃত দি প্ৰতিবেদন খনত এনেদৰে কোৱা হৈছে।
উল্লেখ্য কুৰ্দি মূলৰ এগৰাকী ২২ বছৰীয়া ইৰানী যুৱতী মাহচা আমিনীৰ মৃত্যুৰ পিছতে ইৰাণত হিজাব বিৰোধী প্ৰতিবাদ শক্তিশালী হৈ পৰে। মাহচা আমিনীৰ মৃত্যুৰ পিছৰে পৰা ইৰানৰ বহু সংখ্যক মহিলাই হিজাব পৰিধান কৰা নাই। দেশখনত ১৯৭৯ চনৰ ইছলামিক বিপ্লৱৰ পিছতে মহিলাই হিজাব পিন্ধাটো বাধ্যতামূলক কৰা হৈছিল।
Continue Reading
