বৰ্বৰ ৰুছ সৈন্য; স্বামীক হত্যা কৰি সন্তানৰ সন্মুখতে ধৰ্ষণ মহিলাক

ডিজিটেল ডেস্ক : বিগত এমাহৰো অধিক দিন ইউক্ৰেইন আৰু ৰাছিয়াৰ মাজত অব্যাহত থকা যুদ্ধত কেৱল ধন-জনৰে ক্ষতি হোৱা নাই, ব্যাপকভাৱে ভূলুণ্ঠিত হৈছে মানৱতাও। ৰাছিয়াৰ সৈন্যই এতিয়া ইউক্ৰেইনৰ মহিলা-যুৱতীক বাছি লৈছে আক্ৰোশ পূৰণৰ আহিলা হিচাপে৷ ইউক্ৰেইন দখলৰ চেষ্টাৰে এফালৰ পৰা দেশখন ধ্বংস কৰি অহা ৰুছ সেনা বৰ্বৰতাৰ কাহিনীয়ে এতিয়া তীব্ৰ প্ৰতিক্ৰিয়াৰ সৃষ্টি কৰিছে৷ ইউক্ৰেইনৰ এগৰাকী সাংসদ মাৰিয়া মেজেণ্টসেৱাই এক দূৰদৰ্শন সাক্ষাৎকাৰত সদৰি কৰিছিল যে, ফেব্ৰুৱাৰীৰ শেষৰফালে ইউক্ৰেইন আক্ৰমণ আৰম্ভ হোৱাৰ পাছৰে পৰা ৰাছিয়াৰ সৈন্যসকলে মহিলাসকলক ধৰ্ষণ আৰু নিৰ্যাতনৰ লক্ষ্য কৰি লৈছে। অতি বৰ্বৰতাৰে ইউক্ৰেইনৰ এগৰাকী মহিলাৰ স্বামীক ৰুছ সেনাই হত্যা কৰি সন্তানৰ সন্মুখতে তেওঁক ধৰ্ষণ কৰিছিল। ভুক্তভোগী মহিলাগৰাকী কিয়েভৰ বাসিন্দা আছিল বুলি জানিব পৰা গৈছে৷ মাৰিয়া মেজেণ্টসেৱাই লগতে কয় যে, ৰাছিয়াৰ আক্ৰমণৰ সময়ত মহিলাৰ বিৰুদ্ধে সংঘটিত অপৰাধৰ 'ভয়াৱহতা' সম্পৰ্কে ইউক্ৰেইন মনে মনে নাথাকে। কেৱল এই এটা গোচৰৰ সলনি আৰু বহুতো ভুক্তভোগী আছে যিটো প্ৰচিকিউটৰ জেনেৰেলৰ দ্বাৰা প্ৰকাশ কৰা হৈছে বুলিও তেওঁ কৈছিল। সাংসদগৰাকীয়ে লগতে দাবী কৰিছে যে, ইউক্ৰেইনৰ বিভিন্ন প্ৰান্তত মহিলাসকলৰ ওপৰত নানা নিৰ্যাতন চলাইছে ৰুছ সেনাই৷ এই ক্ষেত্ৰত ৰাষ্ট্ৰসংঘৰো হস্তক্ষেপৰ আহ্বান জনায় মহিলা সাংসদগৰাকীয়ে।