ডিজিটেল ডেস্কঃ এলি হাম্বি আৰু ছেণ্ডী হেজেলিপ। এজন পেছাত তথ্যচিত্ৰ পৰিচালক, আনজন চিকিৎসক। আমেৰিকা যুক্তৰাষ্ট্ৰৰ টেক্সাছৰ এই দুয়োগৰাকী অশীতিপৰ বৃদ্ধা নলে গলে লগা বান্ধৱী। ৮১ বছৰ বয়সীয়া বান্ধৱী দুগৰাকী চৰ্চালৈ আহিছে এইবাবেই যে মাত্ৰ ৮০ দিনৰ ভিতৰতে বিশ্ব ভ্ৰমণ কৰিছে দুয়ো।
ভ্ৰমণ আৰু দুঃসাহসিক কৰ্মই কোনো বয়স নামানে বুলিও প্ৰমাণ কৰে তেওঁলোকে। এলি আৰু ছেণ্ডীয়ে বিশ্ব ভ্ৰমণকালত ভাৰতলৈ আহিছিল। তাজমহলো দৰ্শন কৰিছিল।
তেওঁলোকৰ ভ্ৰমণৰ বিষয়ে ছেণ্ডীয়ে সংবাদ মাধ্যম চিএনএনক জনাইছে যে ৮০ বছৰ বয়স হোৱাৰ পাছত তেওঁলোকৰ মনলৈ বিশ্ব ভ্ৰমণৰ ধাৰণাটো আহিছিল। তেওঁ কয়, ''আমি আগতেও একেলগে বিভিন্ন ঠাই ভ্ৰমণ কৰিছো। ৭৬ বছৰ বয়সত আমি বিশ্ব ভ্ৰমণলৈ যোৱাৰ কথা আলোচনা কৰিছিলোঁ। ৮০ বছৰ হোৱাৰ লগে লগে আমি বিশ্ব ভ্ৰমণ কৰাৰ সিদ্ধান্ত লওঁ।’’
এলিয়ে ক’লে, “মই আগতেই বিশ্ব ভ্ৰমণত গ’লোঁহেঁতেন। কিন্তু covid ৰ বাবে সেয়া সম্ভৱ নহ'ল। কিন্তু Covid কমি অহাৰ লগে লগে আমি বিশ্ব ভ্ৰমণত নামি পৰিলো।’’
শেহতীয়াকৈ এলি আৰু ছেণ্ডীয়ে ৮০ দিনীয়া বিশ্ব ভ্ৰমণৰ অন্তত টেক্সাছলৈ উভতি গৈছে। ভ্ৰমণকালত তেওঁলোকে লণ্ডন, জাঞ্জিবাৰ, জাম্বিয়া, ইজিপ্ত, নেপাল, বালি আৰু ভাৰতৰ বিভিন্ন ঠাই দৰ্শন কৰে।
ভাৰতত থকাৰ সময়তে দুয়োগৰাকী বান্ধৱীয়ে তাজমহলৰ সন্মুখত থিয় হৈ একেলগে এখন ফটো তুলিছিল। শেহতীয়াকৈ তেওঁলোকে সেই ছবিখন ইনষ্টাগ্ৰামত শ্বেয়াৰ কৰিছে। কেৱল সেয়াই নহয়, তেওঁলোকে ভাৰতলৈ আহি দিল্লীৰ ৰাজপথত ৰিক্সাত উঠিও ঘূৰি ফুৰিছিল।
Continue Reading
