ডিজিটেল ডেস্ক : চীনত ৪ ফেব্ৰুৱাৰীৰ পৰা অনুষ্ঠিত হ'বলৈ গৈ আছে শীতকালীন অলিম্পিক৷ এই শীতকালীন অলিম্পিকত চীনে ৰাজনীতিক আঁতৰাই ৰখাৰ দাবী আকৌ এবাৰ উন্মোচিত হৈছে৷ চীনৰ পিএলএ ৰেজিমেণ্টৰ কমাণ্ডাৰ লেফটেনেণ্ট কৰ্ণেল কি ফাবাও , যি ২০২০ চনত ভাৰতীয় সৈন্যৰ সৈতে গালৱান উপত্যকাৰ সংঘৰ্ষৰ সময়ত মূৰত আঘাতপ্ৰাপ্ত হৈ ক’মাত আছিল, তেঁৱেই শীতকালীন অলিম্পিক শিখা দৌৰত উৎকৃষ্ট নিদৰ্শন দাঙি ধৰিছে৷ চীনৰ এটি চৰকাৰী সংস্থাই এটা টুইটত লিখিছিল যে গালৱানত সাহসেৰে যুঁজ দিয়া পিএলএ ৰেজিমেণ্টৰ কমাণ্ডাৰে ৰিলেৰ সময়ত অলিম্পিকৰ শিখা লৈ দৌৰিছিল। উল্লেখ্য যে, ভাৰতৰ সৈতে গালৱান উপত্যকা সীমান্তৰ সংঘৰ্ষত প্ৰবল পৰাক্ৰমেৰে যুঁজি থাকোতে কি ফাবাওৱে মূৰত আঘাত পাইছিল। অলিম্পিক শিখা লৈ তেওঁৰ সৈতে একেলগে দৌৰিছে ১২০০ শিখাধাৰকে৷ ৪ ফেব্ৰুৱাৰীত ৰাষ্ট্ৰীয় ষ্টেডিয়ামত এই শিখা জ্বলোৱা হ'ব, তাৰপাছত বেইজিং-২০২২ শীতকালীন অলিম্পিক গেমছ আৰম্ভ হ'ব।
উল্লেখ্য যে, ২০২১ চনৰ ১৯ অক্টোৱৰত এথেন্স (গ্ৰীচ)ৰ পানাথেনিক ষ্টেডিয়ামত অনুষ্ঠিত এক অনুষ্ঠানত শীতকালীন অলিম্পিকৰ আয়োজক চীনক অলিম্পিক শিখা প্ৰদান কৰা হৈছিল। ইয়াৰ সৈতে সম্পৰ্কিত প্ৰতিযোগিতাসমূহ বেইজিঙত অনুষ্ঠিত হ'ব। উদ্বোধনী অনুষ্ঠানটো 'বাৰ্ডচ নেষ্ট' ৰাষ্ট্ৰীয় ষ্টেডিয়ামত অনুষ্ঠিত হ'ব। উল্লেখযোগ্য যে, বেইজিং হ'ব গ্ৰীষ্মকালীন আৰু শীতকালীন অলিম্পিক আয়োজন কৰা প্ৰথমখন চহৰ ৷ পেৰালিম্পিক শীতকালীন ক্ৰীড়া ৪ মাৰ্চৰ পৰা ১৩ মাৰ্চলৈ চলিব। বেইজিং ২০২২ শীতকালীন অলিম্পিক গেমছত সাতটা ক্ৰীড়া নতুনকৈ যোগ কৰা হৈছে।
আমেৰিকা যুক্তৰাষ্ট্ৰ আৰু ব্ৰিটেইনকে ধৰি পশ্চিমীয়া দেশসমূহে চীনত মানৱ অধিকাৰ উলংঘনৰ অভিযোগত এই ঘটনাবোৰ কূটনৈতিকভাৱে বৰ্জন কৰাৰ কথা ঘোষণা কৰিছে। অৱশ্যে, পাকিস্তানৰ প্ৰধানমন্ত্ৰী ইমৰান খান, ৰাছিয়াৰ ৰাষ্ট্ৰপতি ভ্লাদিমিৰ পুটিন আৰু ৰাষ্ট্ৰসংঘৰ মহাসচিব এণ্টনিও গুটেৰেছকে ধৰি কেইবাগৰাকীও নেতাই শীতকালীন অলিম্পিকৰ উদ্বোধনী অনুষ্ঠানত অংশগ্ৰহণ কৰিব বুলি জানিব পৰা গৈছে৷
