ছাহাৰাত থকা ১০ কোটি লোকৰ টকা দিয়া হ’ব ঘূৰাই; অমিত শ্বাহে মুকলি কৰিলে ছাহাৰা ৰিফাণ্ড পৰ্টেল

স্মৰ্তব্য যে, সমগ্ৰ দেশৰ ১০ কোটি বিনিয়োগকাৰীৰ কোটি কোটি টকা আবদ্ধ হৈ আছে ছাহাৰা ইণ্ডিয়াত। এই পৰ্টেল মুকলি হোৱাৰ লগে লগে বিনিয়োগকাৰীসকলৰ মাজত আশাৰ সঞ্চাৰ হৈছে যে তেওঁলোকৰ আবদ্ধ হৈ থকা ধন এতিয়া উদ্ধাৰ হ’ব। নতুন দিল্লীত ছাহাৰা ৰিফাণ্ড পৰ্টেলৰ উন্মোচন কাৰ্যসূচীত অমিত শ্বাহে কয় যে বহু বছৰ ধৰি ছাহাৰাৰ সমবায় সমিতিত যিসকল লোকৰ ধন আবদ্ধ হৈ আছিল তেওঁলোকক ঘূৰাই দিয়াৰ প্ৰক্ৰিয়া আৰম্ভ কৰা হৈছে। এই পৰ্টেলে চাহাৰা গ্ৰুপৰ ১০ কোটিৰো অধিক জমাকাৰীক তেওঁলোকৰ ধন ঘূৰাই পোৱাত সহায় কৰিব।ৰিফাণ্ড পৰ্টেল মুকলি কৰাৰ সময়ত কেন্দ্ৰীয় মন্ত্ৰী অমিত শ্বাহে কয়, "ছাহাৰা গ্ৰুপৰ চাৰিখন সমবায় সমিতিৰ আৱদ্ধ জমাকাৰীৰ ধন ঘূৰাই দিয়াৰ প্ৰক্ৰিয়া আৰম্ভ হৈছে।" 

যোৱা ২৯ মাৰ্চত চৰকাৰে কৈছিল যে ৯ মাহৰ ভিতৰত চাহাৰা গোটৰ চাৰিখন সমবায় সমিতিৰ প্ৰায় ১০ কোটি বিনিয়োগকাৰীক এই ধন ঘূৰাই দিয়া হ’ব। ছাহাৰা-ছেবি ৰিফাণ্ড একাউণ্টৰ পৰা ৫ হাজাৰ কোটি টকা সমবায় সমিতিৰ কেন্দ্ৰীয় পঞ্জীয়কলৈ হস্তান্তৰ কৰিবলৈ উচ্চতম ন্যায়ালয়ে দিয়া নিৰ্দেশৰ পাছতে এই ঘোষণা কৰা হৈছে।দাবী প্ৰক্ৰিয়া সহজ কৰি তুলিবলৈ মঙলবাৰে এক বিশেষ পৰ্টেল মুকলি কৰা হয়। ছাহাৰা গ্ৰুপৰ সমবায় সমিতিৰ প্ৰকৃত জমাকাৰীৰ হৈ বৈধ দাবী দাখিলৰ বাবে পৰ্টেল প্ৰস্তুত কৰা বুলি মন্ত্ৰালয়ে জানিবলৈ দিয়ে৷ছাহাৰা গ্ৰুপৰ এই সমবায় সমিতিসমূহত ধন জমা কৰা বিনিয়োগকাৰীসকলক সকাহ দিয়াৰ বাবে সমবায় মন্ত্ৰালয়ে উচ্চতম ন্যায়ালয়ত আবেদন দাখিল কৰিছিল। ইয়াৰ পাছত উচ্চতম ন্যায়ালয়ে তেওঁলোকৰ দাবী নিষ্পত্তি কৰিবলৈ চি আৰ চি এছলৈ ৫ হাজাৰ কোটি টকা হস্তান্তৰ কৰাৰ নিৰ্দেশ দিয়ে।