ডিজিটেল ডেস্ক: বলীউডৰ প্ৰবীণ অভিনেত্ৰী ছাইৰা বানুক সাক্ষাৎ কৰিছে প্ৰধানমন্ত্ৰী মোদীয়ে৷ এসময়ত হিন্দী চিনেমাত চমকপ্ৰদ অভিনয়েৰে দৰ্শকৰ হৃদয়ত ঘৰ সজা ছাইৰা বানুক সাক্ষাৎ কৰি নষ্টালজিক হৈ পৰে প্ৰধানমন্ত্ৰীগৰাকী৷
প্ৰধানমন্ত্ৰী মোদীয়ে অভিনেত্ৰী ছাইৰা বানুক সাক্ষাৎ কৰি কয় যে চিনেমাজগতত তেওঁৰ সৃষ্টিৰাজি আৰু অৱদান প্ৰজন্মজুৰি প্ৰশংসিত। প্ৰধানমন্ত্ৰীয়ে ‘এক্স’ত অভিনেত্ৰীগৰাকীৰ সৈতে সাক্ষাতকালৰ ফটো শ্বেয়াৰ কৰিছিল।
ফটো শ্বেয়াৰ কৰি প্ৰধানমন্ত্ৰীগৰাকীয়ে লিখিছিল, ছাইৰা বানুজীক লগ পাই অভিভূত হৈছোঁ৷ চিনেমাৰ পৃথিৱীত তেওঁৰ অগ্ৰণী কাম প্ৰজন্মজুৰি প্ৰশংসিত হয়। আমি বিভিন্ন বিষয়ত সুন্দৰ বাৰ্তালাপ কৰিছিলোঁ।
উল্লেখ্য যে ছাইৰা বানু কিংবদন্তি অভিনেতা প্ৰয়াত দিলীপ কুমাৰৰ পত্নী। তেওঁ ১৯৬১ চনত শাম্মী কাপুৰ অভিনীত ‘জংলী’ৰ জৰিয়তে অভিনয়ৰ আৰম্ভণি কৰিছিল। তেওঁ আন বহুতো চিনেমাৰত্নৰ ভিতৰত ‘শাগিৰ্ড’, ‘চাগিনা’, ‘ব্লাফ মাষ্টাৰ’, ‘আয়ে মিলান কি বেলা’, ‘পাডোচান’ আৰু ‘বাইৰাগ’ৰ দৰে চিনেমাত অভিনয় কৰিছিল। তেওঁৰ অন্তিমখন চিনেমা আছিল ১৯৮৮ চনত মুক্তি পোৱা ‘ফৈছলা’।
Continue Reading
