ডিজিটেল ডেস্ক: বায়ু প্ৰদূষণৰ ভয়াৱহতাৰ মাজতে পুনৰ ভূমিকম্পই আতংকিত কৰিলে দিল্লীবাসীক৷ শনিবাৰে দিল্লীত আবেলি ৩.৩৬ বজাত অনুভূত হয় ২.৬ প্ৰাৱল্যৰ মৃদু ভূমিকম্প৷
আজি অনুভূত ভূমিকম্পটোৰ অভিকেন্দ্ৰস্থল দিল্লীৰ উত্তৰ জিলাৰ ভূপৃষ্ঠৰ পৰা ১০ কিলোমিটাৰ তলত আছিল বুলি জানিব পৰা গৈছে৷ নেচনেল চেণ্টাৰ ফৰ চিচমোলজীয়ে সদৰী কৰিছে এই তথ্য। অৱশ্যে, আজিৰ ভূমিকম্পত কোনো লোক হতাহত বা সম্পত্তিৰ ক্ষতিৰ কোনো খবৰ প্ৰকাশিত হোৱা নাই৷
উল্লেখ্য যে মাত্ৰ কেইদিনমান পূৰ্বে পশ্চিম নেপালত ৫.৬ প্ৰাৱল্যৰ ভূমিকম্পৰ পাছত দিল্লী, ৰাষ্ট্ৰীয় ৰাজধানী অঞ্চল আৰু উত্তৰ ভাৰতৰ কেইবাটাও অঞ্চলত কম্পন অনুভূত হৈছিল।
দিল্লী আৰু ৰাষ্ট্ৰীয় ৰাজধানী অঞ্চল (এনচিআৰ) চতুৰ্থ অঞ্চলত পৰে, যাক ভাৰতীয় মান ব্যুৰো (বিআইএছ) ভূমিকম্পৰ জোনিং মানচিত্ৰ অনুসৰি এক উচ্চ ভূমিকম্পৰ বিপদাশংকা ক্ষেত্ৰ বুলি গণ্য কৰা হয়। ‘জোন’ চতুৰ্থই মজলীয়াৰ পৰা উচ্চস্তৰৰ তীব্ৰতাৰ সৈতে ভূমিকম্প অনুভৱ কৰাৰ অধিক সম্ভাৱনাক সূচায়।
Continue Reading
