ডিজিটেল ডেস্কঃ বৰপেটাৰ হোলী উৎসৱৰ ভেটিত নিৰ্মিত ‘ফাগু খেলে কৰুণাময়’ নামৰ তথ্যচিত্ৰখন দশম আন্তৰ্জাতিক চলচ্ছিত্ৰ মহোৎসৱ ছিমলালৈ নিৰ্বাচিত হৈছে৷ আগষ্ট মাহৰ ১৬ তাৰিখৰ পৰা ১৮ তাৰিখলৈ এই মহোৎসৱ অনুষ্ঠিত হ’ব৷
ছবিখনৰ পৰিচালক উৎপল দত্ত আৰু প্ৰযোজক প্ৰফেচৰ বন্দনা দত্ত৷ ছবিখনৰ কেমেৰাৰ কাম দীপজ্যোতি ডেকাৰ, ধাৰাভাষ্য আৰু সংগীত পৰিচালনা তৰালি শৰ্মাৰ আৰু সম্পাদনা ৰক্তিম ৰঞ্জন বসুমতাৰীৰ৷ ছবিখন নিবেদন কৰিছে অসম ডাউন টাউন বিশ্ববিদ্যালয়ৰ হিউমেনিটিজ এণ্ড ছছিয়েল চায়েন্স বিভাগে৷
বিশ্ববিদ্যালয়খনৰ বিভিন্ন বিভাগে অধ্যয়নৰ অংগ হিচাপে কৰা বিভিন্ন গৱেষণামূলক আৰু ক্ষেত্ৰভিত্তিক অধ্যয়ণৰ অংগ হিচাপে তথ্যৰ ভিডিঅ’ ৰেকৰ্ডিং কৰা ব্যবস্থা আছে৷ সেই ব্যৱস্থাক অলপ বহল ৰূপ দি তথ্যচিত্ৰ নিৰ্মাণৰ কাম কৰা হৈছে৷ বিশ্ববিদ্যালয়খনে ইতিমধ্যে মাজুলীৰ সত্ৰীয়া, ওজাপালি, দেৱদাসী নৃত্য, মহিলাই পৰিবেশন কৰা নাম আদি বিষয়ৰ কেইবাখনো তথ্যচিত্ৰ প্ৰস্তুত কৰিছে৷
গবেষণামূলক এই তথ্যচিত্ৰবোৰ বিশ্ববিদ্যালয়ৰ পুথিভড়ালত সংৰক্ষিত আছে আৰু আগ্ৰহী দৰ্শকে চোৱাৰ ব্যবস্থাও ৰখা হৈছে৷ ‘অসমৰ লুপ্ত হৈ যাব ধৰা সাংস্কৃতিক সম্পদবোৰৰ বিষয়ে গবেষণা কৰি সেইবোৰক অবিকৃত ৰূপত ধৰি ৰাখি সংৰক্ষণ কৰাই এই প্ৰচেষ্টাৰ মূল আদৰ্শ’- প্ৰফেচৰ বন্দনা দত্তই তথ্যচিত্ৰ নিৰ্মাণৰ উদ্দেশ্যৰ কথা বাখ্যা কৰি এনেদৰে কয়৷
Continue Reading
