ছলমান ৰুডশ্বীৰ আক্ৰমণৰ সৈতে জড়িত নহয় ইৰাণ, বৰঞ্চ এই আক্ৰমণৰ বাবে লেখকজন নিজেই জগৰীয়া, ইৰাণৰ চৰকাৰী ঘোষণা

ডিজিটেল ডেস্ক : বিশিষ্ট সাহিত্যিক ছলমান ৰুডশ্বীক কিছুদিন পূৰ্বে নিউয়ৰ্কত ভাষণ প্ৰদান কৰি থকা অৱস্থাত আক্ৰমণ কৰিছিল এজন ২৪ বছৰীয়া যুৱকে৷ এই আক্ৰমণত গুৰুতৰভাৱে আঘাতপ্ৰাপ্ত হৈছিল লেখক গৰাকী৷ বৰ্তমান ক্ৰমান্বয়ে শাৰিৰীক অৱস্থাৰ উন্নতি ঘটিছে সাহিত্যিক ছলমান ৰুডশ্বীৰ৷ ইয়াৰ মাজতে  ছলমান ৰুডশ্বীৰ আক্ৰমণত কোনোধৰণে জড়িত নহয় বুলি ৰাজহুৱাভাৱে ঘোষণা কৰিলে ইৰাণে৷

 ইৰাণৰ বৈদেশিক মন্ত্ৰীৰ মুখপাত্ৰ নাছিৰ কানানীয়ে মন্তব্য কৰে যে, ইৰাণ আৰু  ছলমান ৰুডশ্বীৰ আক্ৰমণকাৰীৰ মাজত কোনো ধৰণৰ সংযোগ নাই৷ ইয়াৰ বিপৰীতে এই আক্ৰমণৰ বাবে ছলমান ৰুডশ্বী নিজেই জগৰীয়া৷ সাহিত্যিকজনৰ কাৰুকাৰ্যই কেৱল ইৰাণকে নহয়, সমগ্ৰ মুছলিম সম্প্ৰদায়কে ক্ষোভিত কৰি তুলিছে৷

 যোৱা ৩০ বছৰৰ পৰাই বহু মুছলিম সংগঠনৰ পৰা মৃত্যুৰ ভাবুকি লাভ কৰি আহিছিল লেখকজনে। আৰু অৱশেষত বাৰ আগষ্টত মঞ্চতেই এক ভয়ংকৰ আক্ৰমণৰ বলি হৈছিল লেখকজন৷ ১৯৮৮ চনত প্ৰকাশিত The Satanic Verses গ্ৰন্থখনৰ বাবে বিতৰ্কৰ আৱৰ্তত সোমাই পৰিছিল লেখকজন৷এই উপন্যাসখন আছিল হজৰত মহম্মদৰ ওপৰত ৰচিত৷ইয়াৰোপৰি ভাৰতবৰ্ষতো গোপনে দৃশ্যগ্ৰহণ কৰিব লগীয়া হৈছিল ছলমান ৰুডশ্বীৰ উপন্যাস ভিত্তিক ছবিৰ৷ আনফালে মুক্তিৰ পিছতেই ছবিখন নিষিদ্ধ ঘোষণা হৈছিল৷