ডিজিটেল ডেস্কঃ মাওবাদী অধ্যুষিত ছত্তীশগড়ত আৰক্ষী-চিআৰপিএফৰ যুটীয়া অভিযানত তিনিজন মাওবাদী নিহত হৈছে। এক গোপন সূত্ৰৰ পম খেদি আৰক্ষী আৰু চিআৰপিএফৰ এটা যুটীয়া দলে শনিবাৰে পুৱতি নিশা অভিযান আৰম্ভ কৰে। গভীৰ অৰণ্যত মাওবাদীৰ উপস্থিতি নিশ্চিত হোৱাৰ পিছত দুয়ো ক্ষৰ মাজত সংঘৰ্ষ আৰম্ভ হয়।
শনিবাৰে পুৱা ছত্তীশগড়ৰ বিজাপুৰ জিলাত চলোৱা এই অভিযানত এতিয়ালৈকে তিনিজন মাওবাদী নিহত হৈছে বুলি আৰক্ষীয়ে জানিবলৈ দিয়ে। বস্তাৰ ৰেঞ্জৰ আইজি পি সুন্দৰৰাজে কয় যে নিহত মাওবাদীসকলৰ ভিতৰত এগৰাকী মহিলাও আছিল। "ৰাজধানী ৰায়পুৰৰ পৰা প্ৰায় ৪০০ কিলোমিটাৰ দূৰত মিৰ্তুৰ আৰক্ষী থানাৰ পোমৰা বনাঞ্চলত এই সংঘৰ্ষ সংঘটিত হয়। ''
ছত্তীশগড় প্ৰশাসনৰ সূত্ৰ অনুসৰি আৰক্ষী, জিলা সংৰক্ষিত বাহিনী (ডিআৰজি) আৰু চিআৰপিএফৰ বিশেষ টাস্ক ফ'ৰ্চে পোমৰা বনাঞ্চলত মাওবাদী সদস্য মোহন কাদতি আৰু সুমিত্ৰাকে ধৰি ৩০-৪০ জনীয়া মাওবাদীৰ দলে আত্মগোপন কৰি থকাৰ তথ্য লাভ কৰিছিল।
তাৰ পিছতে মাওবাদীৰ সন্ধানত অভিযান আৰম্ভ কৰা হয়। পুৱা গুলীচালনাত তিনিজন মাওবাদীৰ মৃত্যু হোৱাৰ লগতে বহু কেইজন মাওবাদীয়ে পলাই যাবলৈ সক্ষম হয়। সুন্দৰৰাজে কয় যে যুটীয়া বাহিনীয়ে সমগ্ৰ অঞ্চলটো ঘেৰাও কৰি ৰাখিছে আৰু পলাই যোৱা মাওবাীৰ সন্ধানত অভিযান চলাই আছে।
Continue Reading
