ছুইজাৰলেণ্ডত লকডাউনৰ সম্ভাৱনা: ভাৰততো দুগুণ বৃদ্ধি অ’মিক্ৰন

ডিজিটেল ডেস্ক: ক’ভিডৰ প্ৰথম আৰু দ্বিতীয় ঢৌৰ পাছত নতুন প্ৰকাৰ অ’মিক্ৰনৰ ব্যাপক সংক্ৰমণত স্তব্ধ হৈ পৰিছে আমেৰিকাৰ লগতে ইউৰোপ৷ আমেৰিকা আৰু ইউৰোপীয় দেশবোৰত জটিল পৰিস্থিতিৰ ৰূপ লৈছে অ’মিক্ৰমনে৷ সকলো ফালৰ পৰা উন্নত বুলি চিনাক্ত হোৱা এই দেশসমূহত অ’মিক্ৰনৰ সৈতে যেন হাৰ মানিছে চিকিৎসা সেৱাও৷ বিগত ২৪ ঘণ্টাত মিচিগান ৰাজ্যত ১১,৭৮৩ জন লোকৰ দেহত ধৰা পৰিছে মাৰাত্মক অ’মিক্ৰন৷ ৰাজ্যখনৰৰ চিকিৎসালয়সমূহত ৰোগীৰ সংখ্যা ইমানেই বৃদ্ধি পাইছে যে চিকিৎসালয়খনত ভেণ্টিলেটৰৰ তীব্ৰ অভাৱ ঘটিছে। তাৰ বিপৰীতে ২৩৫ জন লোকৰ মৃত্যু হৈছে বুলি প্ৰতিবেদনত প্ৰকাশ কৰিছে।

বিশেষজ্ঞসকলৰ মতে, বৰদিনৰ বাবে বজাৰত হোৱা ভীৰৰ বাবে সংক্ৰমণ দ্ৰুতগতিত বৃদ্ধি পাইছে৷ আন একাংশৰ সমীক্ষা অনুসৰি শীতৰ প্ৰকোপ বৃদ্ধি হোৱাৰ বাবে সংক্ৰমণৰ হাৰো বৃদ্ধি হৈছে৷ আনহাতে, চুইজাৰলেণ্ডে আকৌ এবাৰ লকডাউনসদৃশ পৰিস্থিতিৰ সন্মুখীন হৈছে। ইউকেতো বৃদ্ধিপাইছে কৰ’নাৰ সংক্ৰমণ৷ ইউৰোপীয় দেশ জাৰ্মানীৰ চিকিৎসকসকলে দেশখনৰ নাগৰিকসকলক এণ্টি-ক’ভিড ভেকছিনৰ চতুৰ্থ পালি দিবলৈ পৰামৰ্শ আগবঢ়াইছে। জাৰ্মানীত, এতিয়ালৈকে ১.১ নিযুত লোকক এণ্টি-ক’ভিড ভেকচিনৰ তৃতীয়পালি দিয়া হৈছে।

অ’মিক্ৰমনৰ সংক্ৰমণৰ বাবে জটিল পৰিস্থিতিৰ ফালে ধাৱমাণ হৈছে বিট্ৰেইন৷ দেশখনত আক্ৰান্তৰ সংখ্যা বৃদ্ধি পোৱাৰ ফলত অ’মিক্ৰনৰ শংকাত প্ৰতিষেধক গ্ৰহণ কৰিবলৈ ভীৰ কৰিছে জনতাই৷ আনহাতে বিজ্ঞানীসকলৰ বিশ্লেষণ অনুসৰি, যদি বিট্ৰেনত জনতাৰ সমাগম বন্ধ কৰা নহয় তেনেহ’লে ক’ভিড পৰিস্থিতি বেয়াফাললৈ ধাৱমান হ’ব৷ ফলত অহা এপ্ৰিল মাহৰ অন্তঃভাগলৈকে ২৫ৰ পৰা ৭৫ হাজাৰ লোক প্ৰাণহানি হোৱাৰ সম্ভাৱনা আছে৷ ইতিমধ্যে বিগত ২৪ ঘণ্টাত ৪৪৮ টা নতুন সংক্ৰমণৰ ঘটনা বৃদ্ধি পাইছে। যাৰফলত দেশখনত অ’মিক্ৰনত আক্ৰান্তৰ সংখ্যা ১,২৬৫লৈ বৃদ্ধি হৈছে।

ভাৰততো বৃদ্ধি পাইছে অ’মিক্ৰনৰ সংক্ৰমণ৷ অন্ধ্ৰ প্ৰদেশ, চণ্ডিগড় আৰু কেৰালাত অ'মিক্ৰনৰ সংক্ৰমণ ধৰা পৰিছে৷ ভাৰতত মুঠ ৩৮লৈ বৃদ্ধিপাইছে এই সংক্ৰমণ৷ তাৰ ভিতৰত মহাৰাষ্ট্ৰ আৰু কৰ্ণাটক অ’মিক্ৰনৰ সংক্ৰমণে ভয়াৱহ ৰূপ লৈছে৷ প্ৰকাশ পোৱা তথ্য অনুসৰি, বিদেশৰ পৰা অহা পাঁচজনৰ দেহত ধৰা পৰিছিল মাৰাত্মক নতুন ভাইৰাছবিধ৷ দেশনৰ ভিতৰত ১৮জন মহাৰাষ্ট্ৰৰ, ৯ জন ৰাজস্থানৰ ব্যক্তি দেহত ধৰা পৰিছে ক’ভিড সংক্ৰমণ৷ কৰ্ণাটকৰ আৰু গুজৰাটৰ ৩ জন, ৰাজধানী দিল্লীত ২জনৰ, কেৰালা, অন্ধ্ৰ প্ৰদেশ, চণ্ডিগড় আৰু অসমৰ ১জন লোকৰ দেহত ধৰা পৰিছে কৰ’নাৰ সংক্ৰমণ৷