ডিজিটেল ডেস্কঃ ভাৰতৰ নিৰ্বাচন আয়োগে মঙলবাৰে নিশা দেশৰ ছখন ৰাজ্যৰ বিধানসভা উপ-নিৰ্বাচনৰ দিন ঘোষণা কৰে। ঝাৰখণ্ড , ত্ৰিপুৰা, কেৰালা, পশ্চিম বংগ, উত্তৰ প্ৰদেশ আৰু উত্তৰাখণ্ডৰ সাতখন আসনত ৫ ছেপ্টেম্বৰত উপ-নিৰ্বাচন অনুষ্ঠিত হ'ব আৰু ভোটগণনা ৮ ছেপ্টেম্বৰত অনুষ্ঠিত হ'ব৷ নিৰ্বাচন আয়োগৰ মতে মনোনয়ন দাখিলৰ অন্তিম তাৰিখ ১৭ আগষ্ট আৰু প্ৰাৰ্থিত্ব প্ৰত্যাহাৰৰ অন্তিম তাৰিখ ২১ আগষ্ট ৷
বিধায়কসকলৰ মৃত্যু বা পদত্যাগৰ ফলতে উক্ত আসন কেইখনত উপ-নিৰ্বাচনৰ প্ৰয়োজন হৈছে৷ উত্তৰাখণ্ডৰ বাগেশ্বৰ আসন আৰু পশ্চিম বংগৰ ধুপগুৰি আসন অনুসূচীত জাতিৰ বাবে সংৰক্ষিত ৰখা হৈছে।নিৰ্বাচন আয়োগে বংগৰ ধুপগুৰিৰ সৈতে ঝাৰখণ্ডৰ দুমৰী আৰু কেৰালাৰ পুথুপল্লী সমষ্টিৰ বাবে আজি উপ-নিৰ্বাচনৰ দিন ঘোষণা কৰে।জলপাইগুৰিৰ ধুপগুৰিৰ বিজেপি বিধায়ক বিষ্ণুপদ ৰয়ৰ ২৫ জুলাইত মৃত্যু হৈছিল।
পুথুপল্লী প্ৰয়াত প্ৰাক্তন মুখ্যমন্ত্ৰী ওমেন চাণ্ডিৰ সমষ্টি। ত্ৰিপুৰাৰ ধনপুৰ আৰু বাক্সানগৰ সমষ্টিতো একে দিনাই উপ-নিৰ্বাচন অনুষ্ঠিত হ’ব। কেন্দ্ৰীয় মন্ত্ৰী প্ৰতিমা ভৌমিকৰ পদত্যাগৰ ফলত ধনপুৰ সমষ্টিত উপ-নিৰ্বাচন অনুষ্ঠিত হ'ব। উত্তৰ প্ৰদেশৰ ঘোচি আৰু বাগেশ্বৰ আসনৰ উপ-নিৰ্বাচনো ৫ ছেপ্টেম্বৰত অনুষ্ঠিত হ'ব।
Continue Reading
