ডিজিটেল ডেস্কঃ ভূমিকম্পই মৃত্যু উপত্যকাত পৰিণত কৰা তুৰস্ক আৰু ছিৰিয়াত নিতৌ মৃতদেহ ওলায়েই আছে৷ এনে পৰিস্থিতিত প্ৰশাসনে মৃতদেহ সমাধিস্থ কৰিবলৈ গণ কবৰ খান্দিবলগীয়া পৰিস্থিতিৰ সৃষ্টি হৈছে৷ সময় যোৱাৰ লগে লগে ভূমিকম্পৰ ধ্বংসাৱশেষত আৱদ্ধ লোকসকলক উদ্ধাৰ কৰাৰ সম্ভাৱনা দুৰ্বল হৈ পৰিছে।
তুৰ্কীৰ তাপমাত্ৰা হিমাংকৰ পৰা ৬ ডিগ্ৰী কম হৈছে। ঠাণ্ডাৰ ফলত উদ্ধাৰ অভিযান বাধাগ্ৰস্ত হৈছে।তুৰস্ক আৰু চিৰিয়াত হোৱা ভূমিকম্পৰ ফলত নিহতৰ সংখ্যা ৩৭,০০০ অতিক্ৰম কৰিছে। আনকি দুৰ্যোগৰ এসপ্তাহ পাছতো দুদিন ধৰি মৃত্যুৰ সংখ্যা বাঢ়িয়েই আছে।
উদ্ধাৰ কাৰ্যৰ পৰিৱৰ্তে প্ৰশাসনে এইবাৰ জীয়াই থকা সকলক আশ্ৰয় দিয়াৰ বিষয়ত অধিক জোৰ দি আছে।উদ্ধাৰকাৰীসকলে অৱশ্যে হাৰ মানি যোৱা নাই। পুলিচৰ কুকুৰ আৰু থাৰ্মাল কেমেৰাৰ জড়িয়তে আজিও অব্যাহত আছে উদ্ধাৰ অভিযান৷ ভূমিকম্পৰ ফলত তুৰ্কী আটাইতকৈ বেছি ক্ষতিগ্ৰস্ত হৈছে।
কেৱল এই দেশ খনতে ৩১ হাজাৰ ৬৪৩ জন লোক ভূমিকম্পৰ ফলত মৃত্যুক সাৱটি লৈছে৷ ইয়াৰ উপৰি চিৰিয়াত মৃত্যুৰ সংখ্যা ৫,৭১৪ জন হৈছে।
