ডিজিটেল ডেস্কঃবন্দুকধাৰীৰ আক্ৰমণত পুনৰ কঁপি উঠিল আমেৰিকা৷ মিচিগান ষ্টেট ইউনিভাৰ্চিটিৰ চৌহদত সংঘটিত গুলীচালনাত (স্থানীয় কমেও তিনিজন লোক নিহত আৰু পাঁচজন লোক আহত হৈছে৷ টুইটাৰত স্থাননীয় আৰক্ষীয়ে কয়, "গুলীচালনাৰ ঘটনাত ৩ জন লোকৰ মৃত্যু হৈছে।
৫ জন লোক গুৰুতৰভাবে আহত হৈছে।" অন্তৱৰ্তীকালীন উপ আৰক্ষী প্ৰধান ক্ৰিছ ৰোজমেনে কয় যে আহত কেইবা জনো লোকৰ অৱস্থা সংকটজনক৷ সেয়ে মৃত্যুৰ সংখ্যা অধিক হ’ব পাৰে বুলি আশংকা কৰা হৈছে৷ ৰোজমেনে কয় যে আৰক্ষীয়ে প্ৰথমতে নিশা ৮.১৮ বজাত (আমেৰিকাৰ স্থানীয় সময়) চৌহদৰ বাৰ্কী হলত হোৱা গুলীচালনা সন্দৰ্ভত ফোনকল পাইছিল।
তাৰ পিছত আৰক্ষীয়ে ওচৰৰ এটা অট্টালিকা, বিশ্ববিদ্যালয় ভৱন আদিতো গুলীচালনাৰ খবৰ পাইছিল৷ আৰক্ষী প্ৰধানগৰাকীয়ে কয় যে খবৰ পোৱাৰ পিছতে আৰক্ষীয়ে দ্ৰুততাৰে কাম কৰিছিল আৰু আহতসকলক উদ্ধাৰ কৰিছিল। জানিব পৰা মতে বন্দুকধাৰী সন্দেহজনক ব্যক্তিজনক গুলীচালনা কৰি ভৱনটোৰ উত্তৰ ফালে থকা এমএছইউ ইউনিয়ন ভৱনৰ পৰা ওলাই যোৱা দেখা গৈছিল। মিচিগান ষ্টেট ইউনিভাৰ্চিটি আৰক্ষীয়ে সন্দেহযুক্ত বন্দুকধাৰীজনৰ ছবি মুকলি কৰিছে।
সন্দেহজনক ব্যক্তিজনে ৰঙা জোতা আৰু জিনছৰ জেকেট পিন্ধি আছিল৷ ঘটনাটোৰ বিষয়ে বিৱৰণ দি মিচিগান ষ্টেট ইউনিভাৰ্চিটিৰ গেব ট্ৰুটেলে কয় যে তেওঁ আৰু তেওঁৰ ৰুমমেটসকলে চৌহদত গুলীচালনাৰ ঘটনা অব্যাহত থকাৰ সময়ত আতংকিত হৈ কোঠাৰ ভিতৰতে সোমাই আছিল৷ পিছত আৰক্ষী অহাত তেওঁলোকে বাহিৰলৈ আহি আৰক্ষীক সহায় কৰিছিল৷ উল্লেখ্য আমেৰিকাত বন্দুকধাৰীৰ আক্ৰমণৰ ঘটনা প্ৰায়ে ঘটি আহিছে৷ মিছিগান বিশ্ববিদ্যালয়ত বন্দুকধাৰীয়ে কিয় আক্ৰমণ চলালে সেয়া এতিয়াও জানিব পৰা হোৱা নাই৷
Continue Reading
