বতৰৰ সতর্কবাণী পদ্ধতিত বিৰক্ত দেশবাসী

ডিজিটেল ডেস্ক : কেতিয়াবা পুৱাৰ ভাগত, কেতিয়াবা দুপৰীয়া আৰু কেতিয়াবা মাজনিশা হঠাতে বিশাল শব্দৰে ম'বাইলত সংকেত ধ্বনি বাজি উঠে। এই সংকেত ধ্বনি হৈছে অতি প্রতিকূল বতৰৰ। ভাৰতীয় বতৰ বিজ্ঞান বিভাগে (আই এম ডি) ধুমুহা-বৰষুণ, বজ্রপাত, প্ৰবল বৰষুণৰ সতর্কবাণী দিবলৈ এই বিশাল সংকেত ধ্বনি ম'বাইল ফ'নত দিয়ে। 

বতৰৰ এই জৰুৰী সতর্কবাণী হঠাতে ম'বাইল ফ'নত বাজি উঠে আৰু লাখ লাখ জনতাক সচকিত কৰি তোলে। কিন্তু ঘৰৰ বাহিৰৰ পৰিৱেশ চাই বাসিন্দাসকল আচৰিত হৈ পৰে। বহিৰত প্ৰতিকূল বতৰৰ কোনো চিন-মোকাম নাই। দেশৰ বিভিন্ন অঞ্চলত বৰ্তমান সময়ত আই এম ডিয়ে এনেধৰণৰ প্ৰতিকূল বতৰৰ সতর্কবাণী ম'বাইল ফ'নত দি আহিছে। নতুনকৈ বিতৰ্কৰ সূত্রপাত হয় দিল্লী-এন চি আৰত। নিশা দুই বজাত দিল্লী আৰু ৰাষ্ট্ৰীয় ৰাজধানী অঞ্চলৰ বাসিন্দাৰ ম'বাইল ফ'নলৈ হঠাতে আই এম ডিৰ সতর্কবাণী আহে। 

ঠিক সেইদৰে উত্তৰ প্ৰদেশ আৰু চুবুৰীয়া অঞ্চলতো 'অতি গুৰুতৰ' বতৰৰ সতর্কবাণী আহে। এই সতর্কবাণী শেষ নিশা অথবা কাহিলিপুৱাৰ ভাগত আহে। কিন্তু এই বতৰৰ সতর্কবাণীৰ পাছত তেনেধৰণৰ কোনো প্রতিকূল বতৰৰ পৰিস্থিতি সৃষ্টি নহ'ল। ইয়াক লৈ বাসিন্দাসকল বিৰক্ত হৈ পৰিছে। দেশৰ অধিকাংশ অঞ্চলতে এনেধৰণৰ ঘটনা প্রায়ে ঘটিবলৈ লৈছে।