ডিজিটেল ডেস্কঃ আমাৰ সমাজৰ বহু লোকেই অভিযোগ কৰে যে ছোৱালীয়ে চৰকাৰী চাকৰি কৰা মানুহ পালেই বিয়াত বহে। বহু লোকেই বিয়াৰ বাবে চৰকাৰী চাকৰিক মুখ্য মাপকাঠি বুলি ভাবি লয়। একাংশই অভিযোগ কৰে যে চৰকাৰী চাকৰি কৰা দৰা পালে ছোৱালীয়ে বছৰ বছৰ বৰ্তি থকা প্ৰেম ভৰিৰে গচকি প্ৰেমিকক অকলশৰীয়া কৰি এৰি গুচি যায়। কিন্তু য’ত সঁচা প্ৰেম থাকে তাত এনেকুৱা কথাবোৰ খাপ নাখায়। সঁচা প্ৰেমৰ ওচৰত এই সকলোবোৰ দিশ হাৰি যায়। শেহতীয়াকৈ এগৰাকী ২৪ বছৰীয়া যুৱতীয়ে চৰকাৰী চাকৰি কৰা যুৱকৰ বিবাহৰ প্ৰস্তাৱ নাকচ কৰি পিকআপ ভেন চলোৱা প্ৰেমিক ড্ৰাইভাৰৰ সৈতে বিয়াত বহে।
ৰাজস্থানৰ চুৰুত সংঘটিত হৈছে এই ঘটনা। আঠ বছৰীয়া সম্পৰ্কক বচাবলৈ পাৰ্বতী শৰ্মা নামৰ যুৱতীগৰাকীয়ে যোৱা ৭ জুলাইত ঘৰ পৰিত্যাগ কৰি সেইদিনাই তাৰানগৰৰ এটা মন্দিৰত যোগেন্দ্ৰ শৰ্মা নামৰ প্ৰেমিকজনৰ সৈতে বিবাহপাশত আবদ্ধ হয়।
যোগেন্দ্ৰৰ সৈতে বিয়া হোৱাৰ সিদ্ধান্তক পাৰ্বতীৰ পৰিয়ালে মানি নোলোৱা বাবে তেওঁ এই পদক্ষেপ ল’বলৈ বাধ্য হয়। চৰকাৰী কৰ্মচাৰীগৰাকীক বিয়া কৰাবলৈ পৰিয়ালে হেঁচা দিছিল বুলি দাবী কৰে পাৰ্বতী শৰ্মাই।
যোগেন্দ্ৰক বিয়া কৰাই পাৰ্বতীয়ে সুৰক্ষা বিচাৰি চুৰুৰ দুধৱা খৰাত থকা আৰক্ষী অধীক্ষকৰ কাৰ্যালয়ত উপস্থিত হয়। ইফালে পাৰ্বতীয়ে কয় যে তেওঁৰ ঘৰৰ পৰা ওলাই অহাৰ পিছত পৰিয়ালে তেওঁক নিৰুদ্দেশ হোৱাৰ অভিযোগ দাখিল কৰিছিল। কিন্তু তেওঁ নিৰুদ্দেশ হোৱা নাই মাত্ৰ তেওঁ নিজ প্ৰেমক ৰক্ষা কৰিবৰ বাবেহে ঘৰ এৰি গুচি অহা বুলি স্পষ্ট কৰি দিয়ে আৰক্ষীক।
উল্লেখ্য যে পাৰ্বতী শৰ্মা এম এ পাছ আৰু যোগেন্দ্ৰ শৰ্মাই দ্বাদশ শ্ৰেণীলৈকে পঢ়িছে। বৰ্তমান কৃষি তত্বাৱধায়ক প্ৰতিযোগিতাৰ বাবে প্ৰস্তুতি চলাই আছে ছোৱালীজনীয়ে। পাৰ্বতীৰ মতে, কেইবাজনো ল’ৰাই বিয়াৰ বাবে তেওঁৰ কাষ চাপিছিল। কিন্তু প্ৰেমিক যোগেন্দ্ৰৰ সন্মুখত সেই সকলোবোৰ কথাই অৰ্থহীন যেন লাগিল। এই সকলোবোৰ প্ৰস্তাৱ তেওঁ অস্বীকাৰ কৰিছিল।
Continue Reading
