চন্দ্ৰমোহন পাটোৱাৰী দিল্লীলৈ: ধৰ্মপুৰৰ ৰাজনীতিত প্ৰৱেশ অধ্যাপক বিদ্যুৎ বিকাশ ডেকাৰ

ডিজিটেল ডেস্ক: অসম চৰকাৰৰ কেবিনেট মন্ত্ৰী চন্দ্ৰমোহন পাটোৱাৰীয়ে প্ৰতিনিধিত্ব কৰি থকা ধৰ্মপুৰ বিধানসভা সমষ্টিত হ’বলৈ গৈ আছে ব্যাপক ৰাজনৈতিক পট পৰিৱৰ্তন৷ বৰ্তমান ধৰ্মপুৰৰ বিধায়ক তথা বিজেপিৰ জ্যেষ্ঠ নেতা চন্দ্ৰমোহন পাটোৱাৰীক ভাৰতীয় জনতা পাৰ্টীয়ে ৰাজ্যসভাৰ সাংসদ হিচাপে মনোনীত কৰি দিল্লীলৈ পঠিওৱাৰ প্ৰস্তুতি চলা বুলি খবৰ ওলাইছে৷ অহা এপ্ৰিলত উকলিব ৰাজ্যসভাত অসমৰ দুখন আসনৰ কাৰ্যকাল৷ দুয়োখন আসনৰ বাবে ৰাজনৈতিক দলসমূহে চলাইছে নিজা নিজা সমীকৰণ৷ মুখ্যমন্ত্ৰী হিমন্ত বিশ্ব শৰ্মা, ৰাজ্যিক বিজেপিৰ সভাপতি ভৱেশ কলিতা, মন্ত্ৰী পীযূষ হাজৰিকাৰ মতে দুয়োখন আসনেই লাভ কৰিব বিজেপিয়ে৷   ইতিমধ্যে, ৰাজ্যিক বিজেপিয়ে ৰাজ্যসভা নিৰ্বাচনৰ বাবে প্ৰস্তুতি আৰম্ভ কৰিছে৷ একেদৰে, প্ৰস্তুতি চলাইছে দুই বিৰোধী দল কংগ্ৰেছ আৰু এআইইউডিএফেও৷ এতিয়া অসমৰ ৰাজনীতিত চৰ্চা চলা অনুসৰি, মন্ত্ৰী চন্দ্ৰমোহন পাটোৱাৰীক ৰাজ্যসভাৰ জৰিয়তে দিল্লীলৈ পঠাই ধৰ্মপুৰত ‘নিজৰ মানুহ’ক সংস্থাপন কৰিব বিচাৰিছে মুখ্যমন্ত্ৰী হিমন্ত বিশ্ব শৰ্মাই৷ জানিব পৰা মতে, প্ৰাক্তন মুখ্যমন্ত্ৰী সৰ্বানন্দ সোণোৱালৰ ঘনিষ্ঠ হিচাপে পৰিচিত মন্ত্ৰী চন্দ্ৰমোহন পাটোৱাৰীক লৈ নাৰাজ ৰাজ্যৰ মুখ্যমন্ত্ৰীগৰাকী৷ ইতিমধ্যে, পৰিবহন মন্ত্ৰীগৰাকীৰ ব্যৰ্থ বিভাগৰ বাবে ৰাইজৰ দৃষ্টিত হেয় হৈছিল চৰকাৰ৷ মাজুলীৰ নাও দুৰ্ঘটনা, নিয়োগ মেলা আদি বিষয়ত চন্দ্ৰমোহন পাটোৱাৰীৰ বিভাগৰ ব্যৰ্থতাৰ বাবে সমালোচিত হৈছিল ৰাজ্য চৰকাৰ৷   হিমন্ত বিশ্ব শৰ্মাৰ গুডবুকত থকা নলবাৰী সমষ্টিৰ বিধায়ক জয়ন্ত মল্ল বৰুৱাকো ধৰ্মপুৰৰ পৰা জয়ী হৈ অহা চন্দ্ৰমোহন পাটোৱাৰীৰ বাবেই মন্ত্ৰিত্ব দিব পৰা নাছিল মুখ্যমন্ত্ৰীয়ে৷ জ্যেষ্ঠতা, অভিজ্ঞতা আৰু বৰ্তমান দিল্লীস্থিত এগৰাকী বিজেপিৰ জ্যেষ্ঠ নেতাৰ অনুৰোধতহে পাটোৱাৰীয়ে মন্ত্ৰিত্ব লাভ কৰিছিল বুলি শুনা যায়৷ যাৰ বাবে দ্বিতীয়বাৰৰ বাবে বিধায়ক নিৰ্বাচিত হৈয়ো মন্ত্ৰিত্বৰ পৰা বঞ্চিত হৈছিল ‘দাদা ব্ৰিগেড’ৰ অন্যতম জয়ন্ত মল্ল বৰুৱা৷ সেয়ে এতিয়া ৰাজ্যসভা নিৰ্বাচনত সুযোগৰ সদ্ব্যৱহাৰ কৰিব বিচাৰিছে মুখ্যমন্ত্ৰী শৰ্মাই৷   চন্দ্ৰমোহন পাটোৱাৰীক শৰ্মা কেবিনেটৰ পৰা আঁতৰাই সেই ঠাইত জয়ন্ত মল্ল বৰুৱাক অন্তৰ্ভুক্তিৰ কুচ-কাৱাজ চলাইছে মুখ্যমন্ত্ৰীয়ে। যাৰ বাবে ৰাজ্যিক বিজেপিয়ে চন্দ্ৰমোহন পাটোৱাৰীক ৰাজ্যসভালৈ প্ৰক্ষেপৰ চিন্তা-চৰ্চা কৰিছে বুলি জানিব পৰা গৈছে৷ যদি চৰ্চা চলা ধৰণেই মন্ত্ৰী চন্দ্ৰমোহন পাটোৱাৰীক ৰাজ্যসভালৈ মনোনীত কৰা হয়, তেন্তে কোন হ’ব ধৰ্মপুৰ বিজেপিৰ পৰৱৰ্তী মুখ? এই প্ৰশ্ন এতিয়া ধৰ্মপুৰৰ লগতে নলবাৰীৰ ৰাজনৈতিক প্ৰেক্ষাপটত যথেষ্ট চৰ্চিত হৈছে৷ ৰাজ্যসভালৈ পাটোৱাৰীক প্ৰক্ষেপৰ চিন্তা-চৰ্চা চলা বুলি খবৰ ওলাই থকাৰ মাজতেই ধৰ্মপুৰৰ ৰাজনীতিত প্ৰৱেশ এগৰাকী জ্যেষ্ঠ অধ্যাপকৰ৷   খবৰ অনুসৰি, ধৰ্মপুৰৰ নতুন প্ৰাৰ্থী হ’ব পাৰে মুখ্যমন্ত্ৰীৰ অতি বিশ্বস্ত হিচাপে পৰিচিত এইগৰাকী অধ্যাপক৷ হয়, অনানুষ্ঠিকভাৱে ধৰ্মপুৰৰ ৰাজনীতিত খোজ পেলাইছে বৰমা কলেজৰ উদ্ভিদ বিজ্ঞান বিভাগৰ অধ্যাপক বিদ্যুৎ বিকাশ ডেকাই৷ কালি মুখ্যমন্ত্ৰীৰ জন্মদিনটোতেই ধৰ্মপুৰৰ ৰাজনীতিত প্ৰৱেশ এইগৰাকী বিদ্যুৎ বিকাশ ডেকাৰ৷ ধৰ্মপুৰ সমষ্টিৰ অন্তৰ্গত বনগাঁও নিবাসী তথা বৰমা কলেজৰ অধ্যাপকগৰাকীয়ে কালি সমষ্টিটোৰ ২৭নং পানীগাঁও গাঁও পঞ্চায়তৰ শনিৰোড চ’কত মুখ্যমন্ত্ৰীৰ জন্মদিনৰ আয়োজন কৰে৷ মুখ্যমন্ত্ৰীৰ জন্মদিন উপলক্ষ্যে এটি স্বৰচিত কবিতাও মুকলি কৰিছে বিদ্যুৎ বিকাশ ডেকাই৷   বিগত বিধানসভা নিৰ্বাচনতে বিদ্যুৎ বিকাশ ডেকা ধৰ্মপুৰ সমষ্টিৰ বিজেপিৰ প্ৰাৰ্থী হ’ব বুলি খবৰ ওলাইছিল৷ শেষমুহূৰ্তত পাটোৱাৰী বিজেপিৰ প্ৰাৰ্থী হৈ জয়ী হৈছিল৷ আৰু এতিয়া ৰাজ্যসভা নিৰ্বাচনৰ প্ৰসংগ উত্থাপন হোৱাৰ সময়তে ধৰ্মপুৰৰ ৰাজনৈতিক প্ৰেক্ষাপটত প্ৰৱেশ এইগৰাকী অধ্যাপকৰ৷ কটন কলেজত অধ্যয়ন কৰা দিনৰে পৰা হিমন্ত বিশ্ব শৰ্মাৰ সৈতে ঘনিষ্ঠ বুলি পৰিচিত বিদ্যুৎ বিকাশ ডেকাই মুখ্যমন্ত্ৰীৰ নিৰ্দেশতে ধৰ্মপুৰত সক্ৰিয় হোৱা বুলি অনুমান কৰিছে ৰাজনৈতিক বিশ্লেষকসকলে৷   অৱশ্যে, ৰাজ্যসভাৰ নিৰ্বাচনৰ প্ৰাকমুহূৰ্তত আৰু কিছুদিনৰ পাছতেই স্পষ্ট হ’ব সমগ্ৰ প্ৰেক্ষাপট৷ চন্দ্ৰমোহন পাটোৱাৰীক দিল্লীলৈ পঠাই ধৰ্মপুৰত বিদ্যুৎ বিকাশ ডেকাক সংস্থাপিত কৰি নলবাৰীৰ বিধায়ক তথা মুখ্যমন্ত্ৰীৰ ৰাজনৈতিক সচিব জয়ন্ত মল্ল বৰুৱাক কেবিনেট মন্ত্ৰিত্ব দিবলৈ প্ৰস্তুতি চলাইছে মুখ্যমন্ত্ৰীয়ে৷ আৰু এয়াই যদি হ’বলৈ হয়, তেন্তে পুনৰ উপ-নিৰ্বাচনৰ বাবে সাজু হ’ব লাগিব ধৰ্মপুৰবাসী৷ একেসময়তে, সমষ্টিটোত উপ-নিৰ্বাচনলৈ সাজু হ’ব লাগিব কংগ্ৰেছ আৰু অসম জাতীয় পৰিষদো৷