ডিজিটেল ডেস্কঃ চন্দ্ৰত ভৰি দিয়া দ্বিতীয়গৰাকী মহাকাশচাৰীয়ে নিজৰ ৯৩ সংখ্যক জন্মদিনত তেওঁৰ দীৰ্ঘদিনীয়া প্ৰেমিকাৰ সৈতে বিবাহপাশত আবদ্ধ হয়। চন্দ্ৰত খোজ পেলোৱা দ্বিতীয়গৰাকী মহাকাশচাৰীৰ নাম বাজ এলড্ৰিন। ১৯৬৯ চনৰ এপ’ল’ ১১ অভিযানৰ অংশ হিচাপে চন্দ্ৰত ভৰি দিয়া তিনিজন আমেৰিকান মহাকাশচাৰীৰ ভিতৰত এলড্ৰিন আছিল অন্যতম। শনিবাৰে তেওঁ পত্নী ডাঃ অংকা ফৌৰ (৬৩)ৰ সৈতে টুইটাৰত ছবি পোষ্ট কৰে। তেওঁ লিখিছে যে তেওঁলোকে কেলিফৰ্ণিয়াৰ লছ এঞ্জেলছত এক সৰু অনুষ্ঠানত বিবাহপাশত আবদ্ধ হয়।
প্ৰাক্তন মহাকাশচাৰীগৰাকীয়ে লিখিছে যে মোৰ ৯৩ সংখ্যক জন্মদিনৰ দিনা মোক লিভিং লিজেণ্ডছ অৱ এভিয়েশনে সন্মানিত কৰিব। এই সুযোগতে ঘোষণা কৰিছোঁ যে মোৰ দীৰ্ঘদিনীয়া প্ৰেমিকা ডাঃ অংকা ফৌৰ আৰু মই বিবাহপাশত আৱদ্ধ হৈছো। লছ এঞ্জেলছত এটা সৰু ব্যক্তিগত অনুষ্ঠানত আমি পবিত্ৰ বিবাহ বান্ধোনত বান্ধ খালো। পলায়ন কৰি কিশোৰ-কিশোৰীসকলে বিবাহপাশত আৱদ্ধ হোৱাৰ দৰেই একেই অনুভৱ আমিও কৰিছো।
ছচিয়েল মিডিয়াত ফটো পোষ্ট কৰা লগে লগে এই নৱ দম্পতীক শুভকামনাৰে উপচাই পেলাইছে নেটিজেনসকলে। বহুতে মন্তব্য কৰিলে বাহ! অভিনন্দন কৰ্ণেল এলড্ৰিন! ৯৩ বছৰ বয়সত আপুনি আৰম্ভ কৰিলে নতুন জীৱন! শুভেচ্ছা থাকিল
উল্লেখযোগ্য যে বাজ এলড্ৰিনে তিনিবাৰকৈ বিয়া পাতিছে আৰু তিনিওগৰাকী পত্নীৰ সৈতে তেওঁ বিবাহ বিচ্ছেদ কৰিছে। এপ’ল’ ১১ মিছনৰ তিনিজনীয়া ক্ৰুৰ ভিতৰত তেওঁ একমাত্ৰ জীয়াই থকা সদস্য। আনহাতে নীল আৰ্মষ্ট্ৰং আছিল চন্দ্ৰৰ পৃষ্ঠত ভৰি দিয়া প্ৰথমজন মহাকাশচাৰী। ১৯ মিনিট পিছত বাজ এলড্ৰিনে তেওঁৰ পিছে পিছে খোজ পেলাইছিল চন্দ্ৰত।
১৯৭১ চনত নাছাৰ পৰা অৱসৰ গ্ৰহণ কৰিছিল প্ৰাক্তন মহাকাশচাৰীগৰাকীয়ে। ১৯৯৮ চনত তেওঁ ক্ৰুযুক্ত মহাকাশ অন্বেষণৰ সম্প্ৰসাৰণৰ প্ৰসাৰৰ বাবে শ্বেয়াৰস্পেচ ফাউণ্ডেশ্যন নামৰ এটা অলাভজনক সংস্থা প্ৰতিষ্ঠা কৰে।
Continue Reading
