ডিজিটেল ডেস্কঃ বাংলাদেশৰ এগৰাকী মহিলাই একেলগে চাৰিটিকৈ কন্যা সন্তানৰ জন্ম দি সকলোকে আচৰিত কৰি তুলিছে৷ মহিলাগৰাকীয়ে একেলগে চাৰিজনী কন্যাসন্তানৰ জন্ম দিয়াৰ পিছত এতিয়া সন্তানসহ নিজেও সুস্থ হৈ থকা বুলি জানিব পৰা গৈছে। ইপিনে পৰিয়ালটোৱে একেলগে চাৰিগৰাকী কন্যা সন্তান লাভ কৰি সুখী হৈ পৰিছে। ঘটনাটো বাংলাদেশৰ জামালপুৰৰ সৰিচাবাৰী উপ-জিলাত ঘটিছে৷ হৈছিল। চিকিৎসকসকলে কৈছে যে চাৰিটাও নৱজাতক স্বাস্থ্যৱান অৱস্থাতে জন্মগ্ৰহণ কৰিছে।
বাতৰিটো বাংলাদেশী সংবাদ মাধ্যম 'প্ৰথম আলো'ত প্ৰকাশ পাইছে৷ খবৰ অনুসৰি ২১ বছৰীয়া অঞ্জুয়াৰা বেগমে জামালপুৰৰ এখন ব্যক্তিগত চিকিৎসালয়ত চাৰিজনী কন্যা সন্তান জন্ম দিয়ে। ৪ জনী কন্যা সন্তানৰ ওজন ক্ৰমে ১ কিগ্ৰা ৮০০ গ্ৰাম, ১ কিগ্ৰা ৭০০ গ্ৰাম, ১কিগ্ৰা ৬০০ গ্ৰাম আৰু ১ কিগ্ৰা ৪০০ গ্ৰাম। নৱজাতককেইটি স্বাস্থ্যকৰ্মীৰ পৰ্যবেক্ষণত আছে। মহিলাগৰাকীও সুস্থ অৱস্থাতে থকা বুলি চিকিৎসকে প্ৰকাশ কৰিছে৷
মহিলাগৰাকীয়ে ছয় বছৰ আগতে আতাউৰ ৰহমান বাবু নামৰ এজন লোকৰ সৈতে বিবাহপাশত আৱদ্ধ হৈছিল। কিন্তু ছবছৰ ধৰি তেওঁলোকে সন্তানৰ মুখ দেখা নাছিল৷ এইবাৰ প্ৰথমবাৰৰ বাবে তেওঁ মাতৃ হৈছে।
একেলগে চাৰিটা সন্তানৰ জন্মৰ কথা নতুন নহয়।অতীততো এনে ধৰণৰ ঘটনাৰ উদাহৰণ আছে। ২০১৯ চনত এগৰাকী মহিলাই ভাৰতৰ উত্তৰ প্ৰদেশৰ গোণ্ডা অঞ্চলত একেলগে চাৰিটা সন্তান জন্ম দিছিল। যোৱা বছৰ ওড়িশাৰ ৰ এগৰাকী মহিলাইএকেলগে চাৰিটা সন্তান জন্ম দিছিল। ৪ টাতকৈ অধিক শিশু একেলগে জন্ম হোৱাৰ উদাহৰণো আছে। যোৱা বছৰ মৰক্কোৰ এগৰাকী মহিলাই একেলগে নটা সন্তান জন্ম দিছিল। গিনিজ বুক অফ ৱৰ্ল্ড ৰেকৰ্ডছে এই তথ্য নথিভুক্ত কৰিছিল৷
Continue Reading
