ডিজিটেল ডেস্কঃ বিলাহীৰ উচ্চ চাহিদা আৰু আকাশলংঘী মূল্যই সকলেোকে বিপাঙত পেলাইছে। মহাৰাষ্ট্ৰৰ এজন কৃষকে নিজৰ ফাৰ্মত থকা বিলাহীক ৰক্ষণাবেক্ষণ দিবলৈ বিশেষ ব্যৱস্থা গ্ৰহণ কৰিছে। তেওঁ চিচিটিভি কেমেৰা স্থাপন কৰি বিলাহীৰ ওপৰত চকু ৰাখিছে। সমগ্ৰ দেশতে ১০০ টকাৰ পৰা ২০০ টকাৰ ভিতৰত বিক্ৰী হৈছে বিলাহী। ঔৰংগাবাদৰ পৰা প্ৰায় ২০ কিলোমিটাৰ নিলগত থকা শ্বাহপুৰ বঞ্জাৰত বিলাহী চোৰে অভিযান চলাই বিলাহী লৈ যোৱা বাবে নিজৰ খেতি চোৱাচিতা কৰিবৰ বাবে ডিজিটেল ব্যৱস্থা গ্ৰহণ কৰে কৃষকজনে।
শাৰদ ৰাৱট নামৰ কৃষকজনে কয় যে বৰ্তমান সময়ত আটাইতকৈ বেছি চাহিদা থকা পাচলি বিলাহী চুৰি কৰাটো তেওঁ সহ্য কৰিব নোৱাৰে। তেওঁ কয় যে এতিয়া ২২-২৫ কেজি বিলাহীৰ এটা ক্ৰেট ৩ হাজাৰ টকাত বিক্ৰী হৈছে। ৰাৱটে কয় যে তেওঁৰ পামখন পাঁচ একৰ মাটিত বিস্তৃত আৰু তেওঁ ডেৰ একৰ মাটিত বিলাহীৰ খেতি কৰিছে, যাৰ পৰা তেওঁ সহজেই ছয়ৰ পৰা সাত লাখ টকা লাভ কৰিব পাৰে।
তেওঁ কয়, “প্ৰায় ১০ দিন আগতে গংগাপুৰ তালুকত মোৰ ফাৰ্মৰ পৰা ২০-২৫ কেজি বিলাহী চুৰি হৈছিল। বাকী থকা বিলাহীৰ সুৰক্ষাৰ বাবে ২২ হাজাৰ টকাৰ চিচিটিভি কেমেৰা লগাই দিছোঁ।''
কৃষক শাৰদ ৰাৱটে লগতে কয় যে চিচি কেমেৰাটো সৌৰশক্তি চালিত গতিকে ইয়াৰ বিদ্যুৎ যোগানৰ বাবে চিন্তা কৰিব নালাগে আৰু যিকোনো ঠাইতে ফুটেজ নিজৰ ফোনত চাব পাৰে।
Continue Reading
