ডিজিটেল ডেস্কঃ মোদী উপাধি বিতৰ্কৰ বাবে কাৰাদণ্ডৰে দণ্ডিত হোৱাৰ পিছতো মোদীৰ বিৰুদ্ধে মন্তব্য কৰাৰ পৰা বিৰত হোৱা নাই ৰাহুল গান্ধী। সাংসদ পদ ওভতাই পোৱাৰ পিছতে ৰাহুল গান্ধীয়ে আজি লোকসভাত ভাষণ দিয়ে। ৰাহুল গান্ধীৰ এই ভাষণৰ বাবেই যেন অপেক্ষা কৰি আছিল বহুতে । অৱশেষত বুধবাৰে লোকসভাত অনাস্থা প্ৰস্তাৱৰ সময়তে কংগ্ৰেছ নেতাজনে ভাষণ দিয়ে।
ৰাহুল গান্ধীয়ে ভাষণত মণিপুৰৰ বিষয়ে বিস্ফোৰক মন্তব্য কৰা দেখা যায়। তেওঁ প্ৰধানমন্ত্ৰী মোদীকো আক্ৰমণ কৰে আৰু মোদীক "অহংকাৰী ৰাৱণ"ৰ সৈতে তুলনা কৰে। ৰাহুল গান্ধীয়ে তেওঁৰ ভাষণত কয় "হনুমানে লংকাত জুই লগোৱা নাছিল। সেই জুই ৰাৱণৰ অহংকাৰৰ বাবে লাগিছিল। মোদীয়ে এতিয়া সমগ্ৰ দেশতে কেৰাচিন ঢালি আছে। "
ভাষণৰ আৰম্ভণিতে ৰাহুলে কয়, "আজি মই আদানিৰ বিষয়ে একো নকওঁ।গতিকে সকলোৱে শান্ত হৈ থাকিব পাৰে। ’’ ৰাহুলে এনেদৰে মন্তব্য কৰাৰ পিছতে বিজেপিৰ সাংসদসকলে হুলস্থূল কৰিবলৈ আৰম্ভ কৰে। অধ্যক্ষই সকলোকে শান্ত হ'বলৈ আহ্বান জনাবলগীয়া হয়।
ৰাহুল গান্ধীকে মোদীক উদ্দেশ্যি কয় "আপুনি ভাৰত মাতৃৰ ৰক্ষক নহয় । আপুনি ভাৰত মাতৃৰ হত্যাকাৰী। মোৰ এগৰাকী মাতৃ ইয়াত বহি আছে। আপুনি মণিপুৰত আন এগৰাকী মাতৃক হত্যা কৰিছে। ভাৰতীয় সেনাই এদিনতে মণিপুৰত শান্তি স্থাপন কৰিব পাৰে। কিন্তু আপুনি সেই সুবিধা ব্যৱহাৰ কৰা নাই। যদি প্ৰধানমন্ত্ৰীয়ে ভাৰতৰ হৃদয়ৰ কথা নুশুনে, তেন্তে তেওঁ কাৰ কথা শুনি আছে?"
ৰাহুলে পুনৰ কয় "প্ৰধানমন্ত্ৰীৰ বাবে মণিপুৰ ভাৰতৰ অংশ নহয়।’’ তেওঁৰ এনে মন্তব্যই বিজেপি সাংসদসকলৰ মাজত হুলস্থূলৰ সৃষ্টি কৰে। কেন্দ্ৰীয় মন্ত্ৰী কিৰেন ৰিজিজুৱে ৰাহুলৰ ভাষণত বাধা দিয়ে । তেওঁ ৰাহুলে ক্ষমা বিচাৰিব লাগে বুলিও দাবী জনায় । কেন্দ্ৰীয় মন্ত্ৰী স্মৃতি ইৰাণীয়েও ৰাহুলক সমালোচনা কৰে।
Continue Reading
