২০ বছৰৰ পাছত ভাৰতত অনুষ্ঠিত হ’ব কমনৱেলথ গেমছ ; ভাৰতীয় অলিম্পিক এছ’চিয়েশ্যনে জনালে অনুমোদন

ডিজিটেল ডেস্ক : ভাৰতে পুনৰবাৰ কমনৱেলথ গেমছ আয়োজন কৰিবলৈ সাজু হৈছে। ভাৰতীয় অলিম্পিক সন্থাই বুধবাৰে ভাৰতক কমনৱেলথ গেমছ আয়োজন কৰিবলৈ আনুষ্ঠানিকভাৱে অনুমোদন জনাইছে।

২০২৩ চনত আহমেদাবাদত কমনৱেলথ গেমছ আয়োজন কৰাৰ বাবে অলিম্পিক এছ’চিয়েশ্যনলৈ প্ৰস্তাৱ প্ৰেৰণ কৰা হৈছিল।এতিয়া ৩১ আগষ্টৰ ভিতৰত চূড়ান্ত নিবিদাৰ বাবে ভাৰতে প্ৰস্তাৱ দাখিল কৰিব লাগিব।

কোনখন চহৰত অনুষ্ঠিত হ’ব কমনৱেলথ গেমছ ২০৩০?

ইণ্ডিয়ান অলিম্পিক এছ’চিয়েশ্যনৰ যুটীয়া সম্পাদক কল্যাণ চৌবেয়ে বিশেষ সাধাৰণ সভাত কয় যে ভাৰতে কমনৱেলথ গেমছ আয়োজন কৰাত সৰ্বসন্মতিক্ৰমে অনুমোদন জনোৱা হৈছে। এতিয়া ভাৰতে ইয়াৰ বাবে সম্পূৰ্ণ শক্তিৰে প্ৰস্তুতি চলাব। ২০৩০ চনত ভাৰতত অনুষ্ঠিত হ’বলগীয়া কমনৱেলথ গেমছ আহমেদাবাদত অনুষ্ঠিত হ’ব। ভাৰতৰ লগতে ২০৩০ চনৰ কমনৱেলথ গেমছ আয়োজনৰ বাবে কানাডাই আবেদন কৰিছিল যদিও এই দেশখন বাদ পৰাৰ পিছত এতিয়া ভাৰতৰ নাম চূড়ান্ত কৰা হৈছে।

কাৰ্যবাহী পৰিষদৰ সদস্য ৰোহিত ৰাজপালে কয় যে সেই সকলোবোৰ খেল কমনৱেলথ গেমছ ২০৩০ত অন্তৰ্ভুক্ত কৰা হ’ব য’ত আমাৰ পদক লাভৰ সম্ভাৱনা বেছি। ৰোহিত ৰাজপালে আৰু কয় যে ২০২৬ চনত গ্লাছগোত কমনৱেলথ গেমছ অনুষ্ঠিত হ’ব, য’ত হকী, মল্লযুঁজ, বেডমিণ্টন আৰু শ্বুটিং অন্তৰ্ভুক্ত কৰা হোৱা নাই আৰু ইয়াৰ আঁৰত দিয়া কাৰণটো হ’ল এইবোৰৰ খৰচ বেছি। ৰাজপালে কয় যে এই প্ৰতিযোগিতাত খেলসমূহ তিনিটা গ্ৰুপত ৰখা হৈছে। প্ৰথমে সেইবোৰ খেল যিবোৰ সদায় অনুষ্ঠিত হৈ আহিছে। দ্বিতীয়তে যিবোৰ আয়োজক দেশখনে বাছি ল’ব পাৰে। আৰু তৃতীয় অতিৰিক্ত খেল, য’ত পৰম্পৰাগত আৰু থলুৱা খেলসমূহ অন্তৰ্ভুক্ত কৰিব পাৰি।

২০১০ চনত দিল্লীত কমনৱেলথ গেমছ অনুষ্ঠিত হৈছিল

ভাৰতে ২০১০ চনত কমনৱেলথ গেমছ দেশৰ ৰাজধানী দিল্লীত আয়োজন কৰিছিল। এতিয়া ২০ বছৰৰ পাছত ভাৰতত আকৌ এবাৰ কমনৱেলথ গেমছৰ আয়োজন হ’বলৈ গৈ আছে।