ডিজিটেল ডেস্কঃ পুনৰ সাংবাদিকৰ মাত বন্ধ কৰিবলৈ উঠিপৰি লাগিছে চৰকাৰ৷দিনজোৰা তালাচী, সামগ্ৰী জব্দ কৰাৰ পাছত মঙলবাৰে দিল্লী আৰক্ষীয়ে নিউজক্লিকৰ প্ৰতিষ্ঠাপক তথা মুখ্য সম্পাদক প্ৰবীৰ পুৰকায়স্থ আৰু প্ৰতিষ্ঠানটোৰ মানৱ সম্পদৰ মুৰব্বী(HR HEAD) অমিত চক্ৰৱৰ্তীক অবৈধ কাৰ্যকলাপ (প্ৰতিৰোধ) আইন(UAPA)ৰ অধীনত গ্ৰেপ্তাৰ কৰে। পৰ্টেলটোৱে চীনৰ পৰা অপপ্ৰচাৰৰ বাবে ধন লাভ কৰা বুলি অভিযোগ উত্থাপন হোৱাৰ পাছতে পৰ্টেলটোৰ প্ৰতিষ্ঠাপকক সন্ত্ৰাসবাদ বিৰোধী আইনৰ অধীনত এই গোচৰৰ সন্দৰ্ভত সোধা-পোছাৰ বাবে দিল্লী আৰক্ষীৰ বিশেষ কোষ কাৰ্যালয়লৈ অনা হয়।
ইয়াৰ পূৰ্বে দিল্লী আৰক্ষীৰ লোকে নিউজ পৰ্টেলটোৰ সৈতে জড়িত কেইবাজনো সাংবাদিকৰ ঘৰত অভিযান চলাই তেওঁলোকৰ লেপটপ, মোবাইল ফোন, হাৰ্ড ডিস্ককে ধৰি প্ৰমাণ হিচাপে তেওঁলোকৰ কেইবাটাও ইলেক্ট্ৰনিক যন্ত্ৰ জব্দ কৰে।আৰক্ষী বিষয়াসকলৰ মতে, এই গোচৰৰ সম্পৰ্কত মুঠ ৪৬ জন সন্দেহযুক্ত লোকক বিভিন্ন স্থানত সোধা-পোছা কৰা হৈছে। ইউএপিএ আৰু ভাৰতীয় দণ্ডবিধিৰ বিভিন্ন ধাৰাত ১৭ আগষ্টত এই গোচৰ ৰুজু হৈছিল।খবৰ অনুসৰি বিভিন্ন বিষয়ত ২৫টা প্ৰশ্নৰ তালিকা য’ত বিদেশ ভ্ৰমণৰ সবিশেষ, নাগৰিকত্ব (সংশোধনী) আইনৰ বিৰুদ্ধে প্ৰতিবাদ আৰু কৃষকৰ আন্দোলন আদিকে ধৰি সাংবাদিকসকলৰ ওপৰত উত্থাপন কৰা হয়।
Continue Reading
